संभाजीनगर (औरंगाबाद) : येथील आमखास मैदानावर आयोजित करण्यात आलेल्या कव्वाली कार्यक्रमात एमआयएम पक्षाचे खासदार इम्तियाज जलील यांच्यावर चक्क नोटांची उधळण करण्यात आली असल्याची घटना घडली आहे.
जलील यांच्यावर पैसे उधळण्याचा व्हिडीओ सध्या मोठ्या प्रमाणात व्हायरल झाला असून याची लोकांमध्ये मोठ्या प्रमाणात चर्चा सुरू आहे.
खासदार जलील यांच्याकडून आमखास मैदानावर विविध स्पर्धांचे आयोजन करण्यात येत आहे. या ठिकाणी प्रशासकीय अधिकारी ते राजकीय नेते देखील हजेरी लावत आहेत.
शुक्रवारी जलील यांच्याकडून कव्वाली कार्यक्रमाचे आयोजन करण्यात आले होते. यावेळी त्यांच्यावर नोटांची बरसात करण्यात आली. या व्हायरल झालेल्या व्हिडीओमुळे अनेकांनी नाराजी व्यक्त केली.
मागील वर्षी डिसेंबरमध्ये देखील तत्कालीन एमआयएमचे जिल्हाध्यक्ष अब्दुल समीर साजेद यांच्या भाचीच्या लग्नात देखील हा प्रकार झाला होता. जलील हे स्टेजवर नवरदेवाला भेटायला गेले असता त्यांच्यावर नोटांचा पाऊस पाडण्यात आला होता.
