मुंबई : पंतप्रधान नरेंद्र मोदी हे आज (ता.१९) मुंबई दौऱ्यावर आहेत. मोदींच्या हस्ते महानगरपालिकेच्या विविध प्रकल्पांचे भूमिपूजन व लोकार्पण, २० दवाखान्यांच्या लोकार्पणासह मलजल प्रक्रिया केंद्र, रुग्णालयांच्या इमारती, रस्त्यांचे सिमेंट काँक्रिटीकरण या कामांचे भूमिपूजन होणार आहे तसेच मोदी यांची बीकेसी मैदानावर सभा देखील होणार आहे. यासाठी मुंबईत भाजप आणि शिंदे गटाकडून जोरदार तयारी करण्यात आली आहे.
मोदींच्या या सभेसाठी २५० हून अधिक बस बूक करण्यात आल्या आहेत. मुंबई, ठाणे, रायगड, पालघर जिल्ह्यातून या एसटी बस मुंबईत दाखल होतील.
मोदींच्या या दौऱ्याच्या निमित्ताने भाजप आणि शिंदे गटाकडून आगामी मुंबई महापालिका निवडणुकीच्या दृष्टीने शक्तिप्रदर्शन करण्यात येणार आहे. मोदींच्या दौऱ्याच्या पार्श्वभूमीवर मुंबईत अनेक ठिकाणी नाकाबंदी करण्यात आली आहे.
