शिरूर : राष्ट्रवादीच्या पदाधिकाऱ्यांनी पोल्ट्रीत घुसून झोपलेल्या कामगारांना लाकडी दांडक्याने बेदम मारहाण केल्याची धक्कादायक घटना जातेगाव बुद्रुक (ता. शिरुर) येथे नुकतीच उघडकीस आली आहे. शिक्रापूर पोलिस ठाण्यात तिघांवर गुन्हा दाखल करण्यात आला आहे.
चंद्रशेखर सिंग व सत्यनाम प्रसाद अशी जखमी झालेल्या कामगारांची नावे आहेत. याप्रकरणी बबन सहादू उमाप (वय ६५ रा. जातेगाव बुद्रुक, ता. शिरुर) यांनी शिक्रापूर पोलीस ठाण्यात फिर्याद दिली आहे. त्यानुसार राष्ट्रवादी विद्यार्थी काँग्रेसचे प्रदेश संघटक नागेश अनिल खळदकर, विक्रम खंडेराव उमाप, आबा खंडेराव उमाप (सर्व रा. जातेगाव बुद्रुक, ता. शिरुर) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, जातेगाव बुद्रुक (ता. शिरुर) येथील बबन उमाप यांच्या पोल्ट्री फार्म आहे. त्यांच्या पोल्ट्रीत काम करणारे कामगार शेडमध्ये झोपलेले असताना आरोपी नागेश खळदकर व त्याच्या दोन साथीदारांनी कामगार चंद्रशेखर सिंग व सत्यनाम प्रसाद या दोघांना शिवीगाळ दमदाटी केली. तसेच आमच्याकडील काम सोडून इकडे आलात का, असे म्हणून लाकडी दांडक्याने बेदाम मारहाण करण्यास सुरुवात केली.
दरम्यान, यावेळी बबन उमाप व अन्य कामगार भांडणे सोडवत असताना आरोपी म्हणाले कामगारांना लय माज आला आहे. आधी आमच्याकडे कामाला होते यांना मारुन टाकतो, असे म्हणत बेदम मारहाण केली. असे बबन उमाप यांनी फिर्यादीत म्हटले आहे.
शिक्रापूर पोलीस ठाण्यात राष्ट्रवादी विद्यार्थी काँग्रेसचे प्रदेश संघटक नागेश अनिल खळदकर, विक्रम खंडेराव उमाप, आबा खंडेराव उमाप यांच्या विरुद्ध गुन्हा दाखल करण्यात आला आहे.
पुढील तपास पोलीस निरीक्षक प्रमोद क्षीरसागर यांच्या मार्गदर्शनाखाली पोलीस हवालदार बापू हडागळे करीत आहेत.
