दिनेश सोनवणे
दौंड :पुणे सोलापूर राष्ट्रीय महामार्गावरील वाहतूक कोंडी सोडवून नागरिकांच्या सुरक्षिततेच्या दृष्टिकोनातून उपाय योजना तातडीने कराव्यात. अशी मागणी दौंड तालुक्याचे आमदार राहुल कुल यांनी केंद्रीय रस्ते वाहतूक आणि महामार्ग मंत्री नितीन गडकरी यांच्या कडे केली आहे.
केंद्रीय वाहतूक मंत्री नितीन गडकरी यांच्या अध्यक्षतेख़ाली व राज्याचे उच्च व तंत्रशिक्षण मंत्री चंद्रकांत पाटील यांच्या प्रमुख उपस्थितीमध्ये पुणे विभागातील राष्ट्रीय महामार्गांच्या कामांची आढावा बैठक पार पडली. या बैठकीत वरील मागण्या आमदार कुल यांनी केंद्रीय मंत्री गडकरी यांच्याकडे केल्या आहेत. दरम्यान, सदर मागण्यांचा सकारात्मक विचार करण्याचे आश्वासन मंत्र्यांकडून देण्यात आले आहे. तसेच संबंधित अधिकाऱ्यांना योग्य ते निर्देश दिले. असे कुल यांनी सांगितले आहे.
या बैठकीला आमदार माधुरी मिसाळ, विभागीय आयुक्त सौरभ राव, महापालिका आयुक्त श विक्रम कुमार, पुणे महानगर विकास प्राधिकरणाचे महानगर आयुक्त राहुल रंजन महिवाल, जिल्हाधिकारी डॉ. राजेश देशमुख, पुणे ग्रामीण पोलीस अधीक्षक डॉ. अभिनव देशमुख, पुण्याचे माजी महापौर मुरलीधर मोहोळ, एनएचएआयचे महाराष्ट्र राज्य प्रादेशिक अधिकारी राजीव श्रीवास्तव, महाराष्ट्र राज्य रस्ते विकास महामंडळाचे मुख्य अभियंता राजेश पाटील, सार्वजनिक बांधकाम विभागाचे मुख्य अभियंता अतुल चव्हाण यांच्यासह राष्ट्रीय राजमार्ग प्राधिकरणाचे अधिकारी उपस्थित होते.
आ.राहुल कुल यांनी केलेल्या मागण्या पुढील प्रमाणे,
१|)पुणे -सोलापूर महामार्गावरील दाट लोकवस्ती असलेल्या भागांतील वाहतुकीची कोंडी सुटावी व वाहतूक सुरक्षेच्या दृष्टीने शेवाळवाडी, लोणी काळभोर, थेऊर फाटा आणि उरुळी कांचन येथील रोड जंक्शन वर उड्डाणपूल बांधण्यात यावा.
२)NH- 548 DG न्हावरा – केडगाव चौफुला रस्ता (KM 16/800 ते 41/700 – लांबी 24.9 KM) या रस्त्याचे रुंदीकरण आणि विस्तारीकरणाचे काम तातडीने हाती घेण्यात यावे.
३)NH-9 पुणे-सोलापूर राष्ट्रीय महामार्गावरील दौंड तालुका हद्दीतील २१ ठिकाणी अतिरिक्त सर्व्हिस रोड आणि स्लिप रोडचे काम तातडीने पूर्ण करावे.
४) NH-9 पुणे-सोलापूर राष्ट्रीय महामार्गावरील वरवंड ता. दौंड (KM 58/200) येथे अतिरिक्त अंडरपास बांधण्यात यावा.
५) केंद्रीय रस्ते निधीद्वारे दौंड तालुक्यातील खोरोडी व बोरीबेल येथे रेल्वे अंडर पास साठी निधी मंजूर करावा.
