Jejuri News जेजुरी : राज्य शासनाकडून ‘शासन आपल्या दारी’ हा उपक्रम राबविण्यात येत आहे. नागरिकांना शासनाच्या विविध योजना व सेवांचा लाभ देण्यासाठी हा उपक्रम सुरू आहे. हा कार्यक्रम जेजुरी येथे येत्या सोमवारी (दि.7) दुपारी दीड वाजता होणार आहे. या कार्यक्रमात मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि पालकमंत्री चंद्रकांत पाटील हे उपस्थित राहणार आहेत. (Jejuri News)
जेजुरी येथे होणाऱ्या या कार्यक्रमात शासनाच्या विविध योजनांची माहिती देण्यासाठी दालने उभारण्यात येणार आहेत. त्यासोबतच महिला बचत गटानी तयार केलेल्या उत्पादनांचेदेखील दालन असणार आहे. मुख्यमंत्री सहाय्यता कक्षातर्फे नागरिकांची निवेदने स्वीकारण्याची सुविधाही येथे असणार आहे. याच ठिकाणी रोजगार मेळाव्याचे देखील आयोजन करण्यात आले आहे. (Jejuri News)
दरम्यान, हा कार्यक्रम यशस्वी करण्यासाठी प्रशासनाकडून तयारी करण्यात येत आहे. या कार्यक्रमाच्या पूर्वतयारीसाठी संबंधित यंत्रणांच्या अधिकाऱ्यांनी शुक्रवारी कार्यक्रमस्थळाला भेट देऊन माहिती घेतली.
विविध उपक्रमांचे आयोजन
जेजुरी येथे होणाऱ्या या कार्यक्रमात विविध उपक्रमांचे आयोजन करण्यात आले आहे. यामध्ये पुणे जिल्ह्यातील उत्पादनाची माहिती देणारे ‘मेक इन पुणे’ प्रदर्शन आणि आरोग्य शिबिराचे आयोजन करण्यात आले. आरोग्य शिबिराच्या माध्यमातून आरोग्य तपासणी आणि उपचार करण्यात येणार आहेत. (Jejuri News)
