पुणे : काँग्रेसचे माजी अध्यक्ष राहुल गांधी यांच्या भारत जोडो यात्रेत तेलंगणामध्ये सहभागी झालेल्या महाराष्ट्राचे राज्याचे माजी उर्जामंत्री नितीन राऊत हैदराबादमध्ये राहुल गांधी यांच्या भारत जोडो यात्रेत सहभागी झाले होते. नितीन राऊत हे यात्रेत राहुल गांधी यांच्यासोबत चालत असताना राहुल गांधी यांना पाहण्यासाठी रस्त्यावर लोकांनी प्रचंड गर्दी केली. यागर्दीवर नियंत्रणात ठेवत पोलीस राहुल गांधी यांच्यापासून गर्दीला दूर ठेवायचा प्रयत्न करत होते. यावेळी तेलंगणातील एका एसीपी दर्जाच्या पोलीस अधिकाऱ्याने नितीन राऊत यांना जोरात ढकलले. या सगळ्या गदारोळात नितीन राऊत यांच्या डोळ्याला जबर मार बसला आहे.
पोलीस अधिकाऱ्याने नितीन राऊत यांना ढकलले तेव्हा ते जमिनीवर ढकलले. यावेळी त्यांचं डोकं जमिनीवर आपटणार असताना नितीन राऊत यानी बचावासाठी डोक्याभोवती हात ठेवला होता. मात्र, तरी देखील त्यांच्या चेहऱ्याला मार लागला. त्यांच्या उजव्या डोळ्याला जबर मार लागला असून डोळ्याच्या भुवईचा भाग कापला गेला आहे. त्यामुळे त्यांचा डोळा अक्षरश: काळानिळा पडला होता. हातापायालाही खरचटले होते. यानंतर नितीन राऊत यांना उपचारासाठी हैदराबादच्या बासेरी रुग्णालयात दाखल करण्यात आले.
या सगळ्या प्रकारानंतर काँग्रेस अध्यक्ष मल्लिकार्जून खरगे, के.सी. वेणुगोपाल, के. राजू यांच्यासह प्रमुख नेत्यांनी रुग्णालयात जाऊन त्यांची भेट घेतली. तर राहुल गांधी यांनी नितीन राऊत यांच्याशी फोनवरुन संपर्क साधला. यावेळी राहुल यांनी राऊत यांच्या प्रकृतीची विचारपूस केली. मंगळवारी संध्याकाळी हा सगळा प्रकार घडला. डॉक्टरांनी नितीन राऊत यांनी तपासणी केल्यानंतर त्यांचा डोळा आणि कानाच्या मधील भागात फ्रॅक्चर झाल्याचे निष्पन्न झाले. यावर डॉक्टरांकडून उपचार करण्यात आले. नितीन राऊत यांनी प्रकृती सध्या स्थिर असून त्यांना लवकरच रुग्णालयातून घरी सोडले जाईल.
