मुंबई : भारत जोडो यात्रेदरम्यान काँग्रेसचे खासदार राहुल गांधी यांनी स्वातंत्र्यवीर सावरकर यांच्यावर टीका केली होती. मात्र, आता या टीकेमुळे सावरकर यांचे नातू रणजित सावरकर हे दादर पोलीस स्टेशन येथे राहुल गांधी यांच्या या वक्तव्यावर तक्रार दाखल करणार असल्याची माहिती मिळत आहे.
सध्या राहुल गांधी यांची भारत जोडो यात्रा महाराष्ट्रात आहे. यावेळी वाशीम येथे राहुल गांधी यांच्या सभेचे आयोजन करण्यात आले होते. या सभेत बोलताना राहुल गांधी यांनी सावरकर यांच्यावर टीका केली.
सावरकर दोन-तीन वर्षे अंदमानच्या तुरुंगात राहिले. त्यानंतर त्यांनी इंग्रजांना माफीनामे पाठवायला सुरुवात केली. नंतरच्या काळात सावरकरांनी वेगळ्या नावाने स्वत:वर पुस्तक लिहले आणि आपण किती शूरवीर होतो, हे सांगितले. सावरकरांना इंग्रजांकडून पेन्शन मिळायची, ते इंग्रजांसाठी काँग्रेस पक्षाविरोधात काम करायचे, अशी टीका राहुल गांधी यांनी केली होती.
याच विधानाची तक्रार करण्यासाठी सावरकर यांचे नातू रणजीत सावरकर हे पोलीस स्टेशनला जाणार असून त्याच्यासोबत शिंदे गटातील खासदार राहुल शेवाळे देखील जाणार असल्याची माहिती सूत्रांकडून मिळाली आहे
