Chhatrapati Sambhajinagar : मुंबई महानगरपालिका निवडणुकीच्या पार्श्वभूमीवर राज ठाकरे आणि उद्धव ठाकरे या दोन भावांनी युतीची घोषणा करून राजकीय वर्तुळात खळबळ उडवून दिली आहे. राज्यभरात या युतीचा जल्लोष साजरा होत असतानाच, छत्रपती संभाजीनगरमध्ये मात्र महाराष्ट्र नवनिर्माण सेनेला मोठा धक्का बसला आहे. मनसेचे जिल्हाध्यक्ष सुमित खांबेकर यांनी पक्षाला रामराम ठोकून एकनाथ शिंदे यांच्या नेतृत्वाखालील शिवसेनेत प्रवेश केला आहे. या निर्णयामुळे एका बाजूला युतीचा आनंदोत्सव सुरू असताना दुसऱ्या बाजूला मनसेच्या बालेकिल्ल्याला खिंडार पडले आहे. (Chhatrapati Sambhajinagar)
१७ वर्षांचा संघर्ष विसरणे अशक्य; खांबेकर यांची नाराजी
सुमित खांबेकर यांनी तडकाफडकी पक्ष सोडण्याचे कारण सांगताना ठाकरे गटासोबतच्या युतीवर तीव्र नाराजी व्यक्त केली आहे. “गेल्या १७ वर्षांपासून मी छत्रपती संभाजीनगरमध्ये ठाकरे गटाच्या विरोधात संघर्ष केला आहे. त्यांच्या चुकीच्या धोरणांविरुद्ध आवाज उठवला आणि जनतेचे प्रश्न मांडले. आता अचानक त्यांच्याच सोबत बसणे मला वैयक्तिकरित्या शक्य नाही,” अशी स्पष्ट भूमिका खांबेकर यांनी मांडली. या युतीमुळे कार्यकर्त्यांची आणि नेत्यांची मोठी अडचण झाल्याचेही त्यांनी यावेळी नमूद केले. (Chhatrapati Sambhajinagar)
एकनाथ शिंदेंच्या नेतृत्वावर विश्वास
पक्षप्रवेशावेळी खांबेकर यांनी एकनाथ शिंदे यांच्या कार्यपद्धतीचे कौतुक केले. “राज्यात आणि शहरात जर खऱ्या अर्थाने कोणाला विकास करायचा असेल, तर ते फक्त एकनाथ शिंदेच करू शकतात. त्यांच्या कामाचा वेग पाहून मी त्यांच्या शिवसेनेत जाण्याचा निर्णय घेतला आहे,” असे त्यांनी सांगितले. राज ठाकरे यांच्याशी सुरुवातीपासून एकनिष्ठ राहिल्यानंतरही केवळ राजकीय अपरिहार्यतेमुळे हा निर्णय घ्यावा लागल्याचे त्यांनी स्पष्ट केले.
मुंबईत युतीची ऐतिहासिक घोषणा
दरम्यान, मुंबईत राज ठाकरे आणि उद्धव ठाकरे यांनी संयुक्त पत्रकार परिषद घेऊन युतीवर शिक्कामोर्तब केले. याप्रसंगी खासदार संजय राऊत देखील उपस्थित होते. मुंबईचा महापौर हा मराठीच असेल आणि तो या युतीचाच होईल, असा ठाम विश्वास यावेळी व्यक्त करण्यात आला. मराठी माणसाच्या हितासाठी सर्वांनी या युतीच्या पाठीशी उभे राहावे, असे आवाहन राज ठाकरे यांनी केले. मात्र, या युतीचे पडसाद आता स्थानिक पातळीवर उमटण्यास सुरुवात झाली असून, आगामी काळात आणखी काही फेरबदल होण्याची शक्यता नाकारता येत नाही.
