भिवंडी : भिवंडी येथे आज रविवारी ओबीसी मेळावा पार पडला. पार पडलेल्या ओबीसी मेळाव्यातून छगन भुजबळ यांनी मनोज जरांगे पाटलांवर जोरदार हल्लाबोल केला. भुजबळांनी जरांगेंचा एकेरी उल्लेख करत त्यांची तुलना मद्यपींशी केली. आधीच माकड त्यात बेवडा प्यायलेला, अशा अर्थाच्या म्हणीचा वापर करत भुजबळांनी टीकास्र सोडलं. २४ डिसेंबरच्या आधीच सरकारने मराठा आरक्षणावर निर्णय घ्यावा, त्यानंतर एक तासही थांबणार नाही, असा इशारा मनोज जरांगे यांनी दिला आहे. मनोज जरांगेंच्या इशाऱ्यानंतर छगन भुजबळ यांनीही आक्रमक पवित्रा घेतला आहे.
“हा जरांगे आमची लायकी काढतो. तो काहीही बोलतो. तो मला म्हणतो, हा ‘येवल्याचा येडपाट’ आहे. आता याला काय सांगायचं? एक म्हण आहे, आधीच मर्कट आणि त्यात मद्य प्यायलेला.. म्हणजे आधीच माकड आणि त्यात बेवडा प्यायलेला… जरांगे काहीही बोलतो. अरे आमची लायकी तू काय पाहतो?” असे
यावेळी छगन भुजबळ म्हणाले.
मराठा समाजाला स्वतंत्र आरक्षण देण्याला आमचा विरोध नाही. आमचा विरोध झुंडशाही आणि दादागिरीला आहे. आरक्षण म्हणजे गरीबी हटाव मोहीम नाही. सध्या ओबीसी प्रवर्गात वाटेकरी येऊ लागले आहेत. राज्यात सध्या ओबीसींमधून आरक्षण द्या, असा अट्टहास सुरू आहे. खोटे कुणबी दाखले दणादण दिले जात आहेत, असा आरोपही छगन भुजबळांनी केला.
