पुणे : विधानसभेचे विरोधी पक्ष नेते अजित पवार यांनी छत्रपती संभाजी महाराजांबद्दल केलेल्या वक्तव्यामुळे पुण्यात भाजप कार्यकर्ते आक्रमक झाले आहे. भाजप कार्यकर्त्यांनी अजित पवारांच्या विरोधात आंदोलन सुरु केले आहे. पुण्यात भाजप शहराध्यक्ष जगदीश मुळीक यांच्या नेतृत्वात आंदोलन करण्यात आले.
छत्रपती संभाजी महाराजांचा अपमान करणाऱ्या अजित पवार यांनी विरोधी पक्षनेते पदाचा राजीनामा द्यावा, अशी मागणी कार्यकर्त्यांनी केली. तर अजित पवारांविरोधात घोषणाबाजीही केली. बारामतीत देखील अजित पवार यांच्या घरासमोर आंदोलन करण्यात आले आहे.
दरम्यान, छत्रपती संभाजी महाराजांबद्दल अवमानकारक वक्तव्य करणाऱ्या अजित पवारांना पाकिस्तानात पाठवून द्या, असे वक्तव्य भाजपचे माजी आमदार नरेंद्र पवार यांनी केले आहे.
