रायगड: तीन राज्याच्या निवडणुकीत भाजपने विजय मिळवला आहे. तेलंगणामध्ये एबीव्हीपीचा कार्यकर्ता काँग्रेसने खेचला अन्यथा तेलंगणाचं चित्रही वेगळं दिसलं असते. आमचा निर्णय काहींना आवडला नव्हता, पण देशात नरेंद्र मोदींशिवाय पर्याय नाही हे आता स्पष्ट झाले आहे, अशी प्रतिक्रिया भाजपच्या विजयानंतर उपमुख्यमंत्री अजित पवारांनी दिली आहे. भारतीय जनता पक्षाचा चेहरा नरेंद्र मोदी आहेत, हेच त्रिवार सत्य आहे, असे देखील अजित पवार या वेळी म्हणाले.
उपमुख्यमंत्री अजित पवार म्हणाले, नरेंद्र मोदींमुळे देशाची प्रतिमा उंचावली आहे. पाच राज्यांचा निकाल चांगला येणार, हे मी आधीच बोललो होतो. मोदींच्या नेतृत्वाखाली देशाची प्रगती होत आहे. इंडिया आघाडीवाले आता ईव्हीएमबाबत बोलतील. ईव्हीएम घोटाळा हा रडीचा डाव आहे. मोंदींसमोर कोण उमेदवार असणार आहे हे सुद्धा विरोधकांचं ठरलं नाही. जनतेने जो कौल दिला आहे तो मान्य केला पाहिजे. ईव्हीएम घोटाळा एकाला शक्य नाही, असं अजित पवार म्हणाले.
