लोणी काळभोर, ता. 19 : वाळत घातलेले पाच ड्रेस गायब झाल्याबाबत चर्चा सुरू असताना शेजाऱ्यांनी गैरसमज करून घेतल्याने वाद झाल्याची घटना घडली आहे. या वादात दांपत्याने महिलेच्या डोक्यावर लाकडी फळीने वार करून शिवीगाळ करून धक्काबुक्की केली आहे. ही घटना कदमवाकवस्ती (ता. हवेली) येथील गुजरवस्ती परिसरात शनिवारी (ता.17) दुपारी चारच्या सुमारास घडली. याप्रकरणी लोणी काळभोर पोलिस ठाण्यात दोघांवर गुन्हा दाखल करण्यात आला आहे.
रामू चराटे व अनिता चराटे यांच्यावर गुन्हा दाखल करण्यात आला आहे. याप्रकरणी ज्योती गायकवाड (वय 40 ) यांनी लोणी काळभोर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी ज्योती गायकवाड या आपल्या मुलगी आणि मुलासह कदमवाकवस्ती येथील गुजरवस्ती परिसरात भाड्याच्या खोलीत राहतात. त्या घरकाम व मजुरी करून कुटुंबाचा उदरनिर्वाह करतात. काही दिवसांपूर्वी त्यांच्या मुलीने धुऊन वाळत घातलेल्या कपड्यांपैकी पाच ड्रेस गायब झाल्याचे त्यांच्या लक्षात आले होते.
ज्योती गायकवाड आणि त्यांची मुलगी पार्किंगमध्ये बसून गायब झालेल्या कपड्यांबाबत 17 ऑक्टोबर रोजी सायंकाळी चारच्या सुमारास चर्चा करत होत्या. त्यावेळी शेजारी राहणाऱ्या रामू चराटे यांच्या मुलीने ही चर्चा ऐकून आपल्या आई-वडिलांना सांगितली. त्यानंतर रामू चराटे आणि त्यांची पत्नी अनिता यांनी पार्किंगमध्ये येऊन, कपडे कोणी नेले याबाबत आम्हाला का विचारता आणि आमचे नाव का घेता, असे म्हणत वाद सुरू झाला.
यावेळी ज्योती गायकवाड यांनी आपण कोणाचेही नाव घेतले नसल्याचे सांगितले. मात्र, वाद सुरू असताना रामू चराटे याने घराशेजारी पडलेली लाकडी फळी उचलून त्यांच्या उजव्या भुवईवर मारली . तसेच अनिता चराटे हिने शिवीगाळ करून धक्काबुक्की केली. घटनेची माहिती मिळाल्यानंतर ज्योती गायकवाड यांच्या नातेवाइकांनी घटनास्थळी धाव घेतली. त्यानंतर त्या उपचारासाठी ससून रुग्णालयात गेल्या.
उपचार घेतल्यानंतर ज्योती गायकवाड यांनी लोणी काळभोर पोलिस ठाण्यात फिर्याद दिली आहे. त्यानुसार रामू चराटे आणि अनिता चराटे यांच्याविरुद्ध लोणी काळभोर पोलिस ठाण्यात भारतीय न्याय संहिता (बी एन एस), 2023 – 115(2),118(1),3(5),351(2),352 प्रमाणे गुन्हा दाखल करण्यात आला आहे. पूढील तपास लोणी काळभोर पोलिस करत आहेत.
