बारामती : बारामतीतील विमानतळ परिसरात प्रसिद्ध उद्योगपती आणि ‘रामा शिपिंग कॉर्पोरेशन’चे मालक राणा दिलीप सूर्यवंशी यांच्यावर हल्ला झाल्याची घटना समोर आली आहे. रविवारी सायंकाळी सुमारे 7:30 वाजता हा प्रकार घडल्याची माहिती आहे. या हल्ल्यात त्यांच्या खांद्याला गंभीर दुखापत झाली असून, उपचारांसाठी त्यांना पुण्यात हलवण्यात आले आहे. सध्या त्यांची प्रकृती स्थिर असल्याचे पोलिसांनी सांगितले.
मिळालेल्या माहितीनुसार, सूर्यवंशी हे वैयक्तिक कामासाठी गोजुबाबी गावाच्या हद्दीत रेल्वे पुलाजवळ गेले होते. त्यावेळी स्कुटीवरून आलेल्या मास्क घातलेल्या 2 अज्ञात व्यक्तींनी त्यांच्याशी संवाद साधला. आपण त्यांचे चाहते असल्याचे सांगून फोटो काढण्याची इच्छा व्यक्त केली. यानंतर त्यांनी फुलांचा गुच्छ दिला आणि अचानक कोयत्याने वार केल्याचा आरोप आहे. या हल्ल्यात त्यांच्या खांद्याला सुमारे 5 ते 6 इंच खोल जखम झाल्याची माहिती समोर आली आहे.
घटनेच्या वेळी त्यांच्यासोबत सरकारी सुरक्षा कर्मचारी नव्हते, असे सांगण्यात येत आहे. हल्ल्यानंतर त्यांना बारामतीतील खासगी रुग्णालयात प्राथमिक उपचार देण्यात आले. त्यानंतर पुढील उपचारांसाठी पुण्यातील रुग्णालयात दाखल करण्यात आले.
दरम्यान, हल्ल्यावेळी मोठा आवाज झाल्याने परिसरात गोळीबार झाल्याची चर्चा सुरू झाली होती. मात्र, घटनास्थळी पाहणी करताना गोळीबाराचे पुरावे किंवा काडतुसे आढळली नसल्याचे उपविभागीय पोलीस अधिकारी चैतन्य कदम यांनी स्पष्ट केले. त्यामुळे गोळीबार झाला होता की नाही, हे अद्याप स्पष्ट झालेले नाही.
राणा शिपिंग कंपनीचे मालक राणा दिलीप सूर्यवंशी यांच्यावर झालेल्या हल्ल्याच्या घटनेनंतर राजकीय वर्तुळातून प्रतिक्रिया उमटू लागल्या आहेत. राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी या घटनेबाबत चिंता व्यक्त करत राज्यातील कायदा-सुव्यवस्थेच्या परिस्थितीवर प्रश्न उपस्थित केले आहेत. या घटनेवर प्रतिक्रिया देताना सुप्रिया सुळे यांनी सोशल मीडियावर पोस्ट शेअर केली. बारामती विमानतळासारख्या महत्त्वाच्या परिसरात अशा प्रकारची घटना घडणे धक्कादायक असल्याचे त्यांनी म्हटले. गुन्हेगारांकडून अशा घटना घडत असताना त्यांना रोखण्यासाठी गृहखात्याने प्रभावी पावले उचलण्याची गरज असल्याचे मत त्यांनी व्यक्त केले.
सुळे यांनी आपल्या पोस्टमधून हल्लेखोरांना तातडीने अटक करण्याची मागणी केली. तसेच नागरिकांच्या सुरक्षेसाठी ठोस उपाययोजना कराव्यात, असेही त्यांनी म्हटले. राज्यात नागरिकांच्या मनात भीती निर्माण होऊ नये आणि गुन्हेगारी घटनांना आळा बसावा, यासाठी प्रशासनाने गंभीरपणे काम करण्याची आवश्यकता त्यांनी अधोरेखित केली.
दरम्यान, या प्रकरणाचा तपास बारामती तालुका पोलीस, स्थानिक गुन्हे शाखा आणि फॉरेन्सिक पथकाकडून सुरू आहे. हल्लेखोरांचा शोध घेण्यासाठी पोलिसांनी तपासाची चक्रे वेगाने फिरवली आहेत. यापूर्वीही सूर्यवंशी यांच्यावर हल्ला झाल्याची माहिती समोर आली असून, त्या घटनेचाही तपासाच्या दृष्टीने विचार केला जात आहे.
