केरळ: केरळमधील पालक्काड जिल्ह्यातील पुथूनगरम येथे एका फिटनेस सेंटरने घेतलेल्या निर्णयामुळे सध्या सर्वत्र चर्चा सुरू आहे. गेल्या 15 वर्षांपासून सुरु असलेल्या या जिमने आता ‘इस्लाम फ्रेंडली’ होण्याचा निर्णय घेतला असून, येथे शरिया कायद्यानुसार नवीन नियमावली लागू करण्यात आली आहे. राज्यातील अशा प्रकारचे हे पहिलेच जिम असल्याचा दावा व्यवस्थापनाकडून करण्यात आला आहे.
या नवीन नियमांनुसार, जिममध्ये कोणत्याही प्रकारच्या गाण्यांवर किंवा संगीतावर पूर्णपणे बंदी घालण्यात आली आहे. व्यायामासाठी येणाऱ्या सदस्यांच्या पेहरावाबाबतही कडक नियम करण्यात आले आहेत. इस्लाममधील ‘अवराह’ तत्त्वाचे पालन करणे येथे अनिवार्य असून, व्यायामाच्या वेळी शरीर पूर्णपणे झाकलेले असावे, असे स्पष्ट करण्यात आले आहे. विशेषतः महिलांना हिजाबसह संपूर्ण शरीर झाकलेले कपडे घालणे बंधनकारक करण्यात आले आहे.
या जिममध्ये स्त्री आणि पुरुषांसाठी व्यायामाची वेळ देखील वेगवेगळी ठेवण्यात आली आहे, ज्यामुळे त्यांना एकत्र वर्कआउट करता येणार नाही. धार्मिक तत्त्वांचे पालन करण्याच्या उद्देशाने हा निर्णय घेतल्याचे व्यवस्थापनाने म्हटले आहे. या बदलांबाबतची माहिती देणारा एक व्हिडिओ सुरुवातीला सोशल मीडियावर प्रसिद्ध करण्यात आला होता, परंतु मोठ्या प्रमाणावर वाद निर्माण झाल्यामुळे तो नंतर काढून टाकण्यात आला.
या प्रकारामुळे सोशल मीडियावर लोकांमध्ये मतमतांतरे दिसून येत आहेत. काही लोकांच्या मते, हा प्रत्येकाचा धार्मिक अधिकार आहे आणि त्यांचे समर्थन करत आहेत. तर, काही लोक सार्वजनिक ठिकाणच्या अशा नियमांवर प्रश्नचिन्ह उपस्थित करत आहेत.
