इराण: पश्चिम आशियातील युद्धाची परिस्थिती दिवसेंदिवस अधिक गंभीर होत चालली आहे. अमेरिकेने इराणवर सलग १० व्या रात्री देखील अत्यंत आक्रमक आणि भीषण हवाई हल्ले सुरूच ठेवले आहेत. या कारवाईला जोरदार प्रत्युत्तर देत इराणने कुवेतमधील ‘कॅम्प अरिफजान’ या प्रमुख अमेरिकन लष्करी तळावर क्षेपणास्त्र हल्ला केल्याचा दावा केला आहे. यासोबतच, येमेनच्या हुती बंडखोरांनी सौदी अरेबियाविरोधात सागरी नाकेबंदी पुकारल्यामुळे जागतिक व्यापार आणि इंधन पुरवठ्यासमोर मोठे संकट उभे ठाकले आहे.
इराणी लष्कराच्या सूत्रांनुसार, त्यांच्या मोहिमेच्या १८ व्या टप्प्यात कुवेतमधील अमेरिकन तळाला लक्ष्य करण्यात आले. जमिनीवरून मारा करणाऱ्या क्षेपणास्त्रांचा वापर करून अमेरिकेची आधुनिक ‘हायमार्स’ यंत्रणा उद्ध्वस्त केल्याचे इराणचे म्हणणे आहे. तथापि, अमेरिकेकडून या दाव्याबाबत कोणतीही अधिकृत पुष्टी करण्यात आलेली नाही. अमेरिकेने मंगळवारी रात्री इराणच्या दक्षिणेकडील सिरिक, बंदर अब्बास आणि चाबहार यांसारख्या महत्त्वाच्या भागांवर जोरदार हवाई हल्ले केले आहेत.
या सर्व संघर्षादरम्यान, येमेनच्या हुती बंडखोरांनी सौदी अरेबियाची कोंडी करण्यासाठी ‘बाब-अल-मंदेब’ सामुद्रधुनी सौदीच्या व्यापारी जहाजांसाठी बंद केल्याची घोषणा केली आहे. आधीच इराण-अमेरिका संघर्षामुळे इंधन पुरवठ्यावर परिणाम झाला असताना, आता या नव्या संकटामुळे जागतिक बाजारपेठेत चिंतेचे वातावरण निर्माण झाले आहे.
