Uttarkashi Tunnel Rescue : नवी दिल्ली : उत्तराखंडमधील उत्तरकाशी जिल्ह्यात सिल्कयारा बोगद्याच काम सुरू असताना मोठी दुर्घटना घडली होती. दरड कोसळल्यामुळे ४१ कामगार बोगद्यात अडकले होते. त्यांना वाचवण्यासाठी विविध यंत्रणांचे काम अंतिम टप्प्यात पोहोचले आहे. मात्र अद्याप त्यांना बाहेर काढण्यात यश आलेलं नाही. गेल्या १२ दिवसांपासून बचावकार्य युद्धपातळीवर सुरू आहे. पण, अद्याप बचावकार्य पूर्ण झालेल नाही. किंबहून आता ते लांबणीवर पडलं आहे. कारण काल ऑगर मशिनमध्ये बिघाड झाला होता. त्यामुळे बचाव कार्याला वेळ लागण्याची शक्यता आहे.
बचावकार्य सुरू असतानाच खोदकाम करणाऱ्या ऑगर मशिनमध्ये मशिनमधील बिघाड झाला होता. ही समस्या सोडविण्याचे काम काल(गुरूवारी) रात्रभर सुरू होते. या समस्येमुळे गेल्या 15 ते 16 तासांपासून खोदकामाचे काम होऊ शकले नाही. गुरूवारी दुपारी एक वाजण्याच्या सुमारास ऑगर मशीनमध्ये तांत्रिक बिघाड झाला, त्यानंतर ती दुरुस्त करण्याचे प्रयत्न सुरू आहेत.
बचावकार्यासाठी ड्रोनचा वापर
आता बचावकार्यावेळी बोगद्याच्या आतमध्ये ड्रोन तंत्रज्ञान वापरण्यात येणार आहे, जेणेकरून बोगद्याच्या आतमध्ये बचाव कार्यादरम्यान कोणत्या प्रकारच्या समस्या उद्भवू शकतात याचा आधीच अंदाज घेण्याचा प्रयत्न केला जाईल. यावेळी बोगद्यात अडकलेल्या मजुरांशी सतत चर्चा करण्यात येत असून त्यांच्यापर्यंत आवश्यक वस्तू पोहोचवल्या जात आहेत.
100 मीटर अंतर राहिल
अडकलेल्या कामगारांपर्यंत पोहचण्यासाठी फक्त 100 मीटरचं अंतर राहिल आहे. काल गुरुवारी मशीन खराब झाल्यानंतर देश-विदेशातून तज्ज्ञांना पाचारण करण्यात आले होते. अडकलेल्या कामगारांपर्यंत पोहोचण्यासाठी आणि त्यांनी बाहेर काढण्यासाठी शर्थीचे प्रयत्न सुरू आहेत. बचावकार्य अंतिम टप्प्यात आले आहे.
