इराण: अमेरिका आणि इराण यांच्यातील युद्धाचा अधिकृत अंत झाला असला, तरी जगासाठी अत्यंत महत्त्वाच्या मानल्या जाणाऱ्या ‘स्ट्रेट ऑफ हॉर्मुझ’ या सागरी मार्गावरील तणावाचे वातावरण निवळलेले नाही. सोमवार, 6 जुलै रोजी ओमानच्या समुद्रात एका व्यापारी तेलवाहू टँकरवर हल्ला केल्यामुळे पुन्हा एकदा खळबळ उडाली आहे. या घटनेने जागतिक व्यापार आणि सागरी सुरक्षेच्या भविष्याबाबत गंभीर प्रश्नचिन्ह निर्माण केले आहे.
ब्रिटिश सुरक्षा संस्था ‘युनायटेड किंगडम मॅरीटाइम ट्रेड ऑपरेशन्स’ (UKMTO) कडून मिळालेल्या माहितीनुसार, ही घटना ओमानमधील ‘लिमाह’पासून 8 नॉटिकल मैल पूर्वेला घडली. दक्षिण दिशेला प्रवास करत असलेल्या एका मोठ्या टँकरच्या बाजूला अचानक एका अज्ञात वस्तूची धडक बसली, ज्यामुळे जहाजावर आग लागली. सुदैवाने, या दुर्घटनेत कोणतीही जीवितहानी झालेली नाही.
महत्त्वाची बाब म्हणजे, दोन्ही देशांमध्ये अलीकडेच शांतता करार होऊन सागरी वाहतूक पुन्हा सुरू झाली असतानाच हा हल्ला झाला आहे. सद्यस्थितीत सुरक्षा यंत्रणा या घटनेचा कसून तपास करत आहेत आणि या परिसरातील इतर जहाजांना अत्यंत सावधगिरी बाळगण्याच्या सूचना दिल्या आहेत.
