हैदराबाद : आंध्र प्रदेशचे माजी मुख्यमंत्री आणि वायएसआर काँग्रेसचे प्रमुख जगनमोहन रेड्डी यांच्या ताफ्यातील कारखाली चिरडून एका ५३ वर्षीय कार्यकर्त्याचा मृत्यू झाल्याची धक्कादायक घटना समोर आली आहे. चिल्ली सिंगा असे मृत व्यक्तीचे नाव असून, शनिवारी (२१ जून) सत्तेनपल्ली येथे झालेल्या कार्यक्रमात ही घटना घडली.

जगनमोहन रेड्डी यांच्या स्वागतासाठी पक्षाचे कार्यकर्ते आणि समर्थकांनी मोठ्या संख्येने गर्दी केली होती. बॅनर आणि फुलांच्या माळा घेऊन कार्यकर्ते त्यांच्या गाडीकडे धावत होते. याच गर्दीत चिल्ली सिंगा देखील उत्साहात धावत असताना अचानक तोल जाऊन ते माजी मुख्यमंत्र्यांच्या ताफ्यातील एका कारच्या चाकाखाली आले. त्यांच्या मानेवरून चाक गेल्याने त्यांचा जागीच मृत्यू झाला.
गर्दी नियंत्रणाबाहेर, सुरक्षा व्यवस्थेवर प्रश्नचिन्ह
ही घटना घडली तेव्हा परिसरात अफरातफरीचा माहोल निर्माण झाला. तातडीने गुंटूर जिल्ह्याचे पोलीस अधीक्षक आणि मोठा पोलीस बंदोबस्त घटनास्थळी दाखल झाला. विशेष म्हणजे या कार्यक्रमासाठी फक्त ३ गाड्यांना परवानगी देण्यात आली होती, मात्र प्रत्यक्षात ३५ ते ४० गाड्या ताफ्यात सहभागी होत्या, याबाबत तपास सुरू करण्यात आला आहे.

या दुर्घटनेनंतर माजी मुख्यमंत्र्यांच्या ताफ्यातील सुरक्षेच्या नियोजनावर गंभीर प्रश्नचिन्ह उपस्थित करण्यात येत आहे. गर्दी नियंत्रित करण्यासाठी पुरेशी यंत्रणा नसल्याचा आरोप कार्यकर्त्यांकडून केला जात आहे.
सध्या पोलीस या प्रकरणाचा सखोल तपास करत असून, चिल्ली सिंगा यांच्या मृत्यूनंतर परिसरात हळहळ व्यक्त करण्यात येत आहे.







