पुणे: पावसाळा सुरू झाला की, याचा थेट परिणाम आपल्या स्वयंपाकघरातील भाज्यांवर होतो. भाज्या लवकर सडणे, त्यांना बुरशी लागणे किंवा किडे होणे अशा समस्या सामान्यपणे दिसून येतात. मात्र, काही सोप्या आणि प्रभावी उपायांनी तुम्ही पावसाळ्यातही भाज्या दीर्घकाळ ताज्या ठेवू शकता आणि बाजाराच्या फेऱ्या वाचवू शकता. गृहिणींसाठी दिलेल्या खास टिप्स अत्यंत उपयुक्त ठरतील. पावसाळ्यात हवेतील ओलावा जास्त असल्याने बॅक्टेरिया आणि बुरशी वाढण्यास पोषक वातावरण निर्माण होते, ज्यामुळे भाज्या लवकर खराब होतात. हे टाळण्यासाठी खालील उपाय नक्की करून पाहा:

पावसाळ्यात भाज्या अधिक काळ ताज्या ठेवण्यासाठी ‘हे’ आहेत सर्वोत्तम मार्ग
१. भाज्या स्वच्छ आणि पूर्णपणे कोरड्या करा: बाजारातून भाज्या आणल्यानंतर लगेच त्या धुण्याची चूक करू नका. जर तुम्हाला त्या साठवून ठेवायच्या असतील, तर वापरण्यापूर्वीच धुवा. भाज्या धुतल्यानंतर त्या पूर्णपणे कोरड्या करणे अत्यंत महत्त्वाचे आहे. यासाठी तुम्ही सुती कापड किंवा टॉवेलचा वापर करून भाज्यांमधील पाण्याचा अंश पूर्णपणे काढून टाका. ओलसर भाज्या लवकर खराब होतात.
२. प्लास्टिक पिशव्या टाळा, कापडी किंवा टिश्यू पेपरचा वापर करा: भाज्या थेट प्लास्टिकच्या पिशव्यांमध्ये ठेवणे टाळा. प्लास्टिकमुळे ओलावा आत साठून राहतो आणि भाज्या लवकर सडतात. त्याऐवजी, पालेभाज्या (उदा. पालक, मेथी, कोथिंबीर, पुदिना) स्वच्छ सुती कापडात गुंडाळून किंवा टिश्यू पेपरमध्ये व्यवस्थित गुंडाळून ठेवा. यामुळे कापड जास्तीचा ओलावा शोषून घेते आणि भाज्या दीर्घकाळ ताज्या राहतात. छिद्र असलेल्या कंटेनरमध्ये टिश्यू पेपर टाकून त्यात या भाज्या ठेवणे अधिक उपयुक्त ठरते.

३. योग्य ठिकाणी साठवणूक:
- कांदे आणि बटाटे: कांदे आणि बटाटे कधीही फ्रिजमध्ये ठेवू नयेत. तसेच, ते प्लास्टिकच्या पिशवीत ठेवू नका. त्यांना कोरड्या, हवेशीर आणि अंधाऱ्या जागी बास्केटमध्ये वेगवेगळे ठेवा. ओलाव्यापासून दूर ठेवल्यास ते जास्त काळ टिकतात.
- मिरची: हिरव्या मिरच्यांचे देठ काढून, त्या एअर-टाईट कंटेनरमध्ये (काचेचे किंवा स्टीलचे डब्बे) ठेवा. यामुळे त्या लवकर खराब होत नाहीत.
- फ्लॉवर: फ्लॉवरच्या तळाशी असलेला देठाकडचा भाग कापून तो कॉटनच्या कपड्यात गुंडाळून ठेवल्यास तो जास्त काळ चांगला राहतो.
- आले: आले स्वच्छ करून, सुकवून पेपर टॉवेलमध्ये गुंडाळून फ्रिजमध्ये ठेवल्यास ते जास्त दिवस टिकते. काही जण हळदीच्या पाण्यात बुडवून सुकवून ठेवतात.
- टोमॅटो: टोमॅटो जास्त काळ टिकवण्यासाठी त्यांची हिरवी पाने काढून वरच्या भागावर टेप लावू शकता. यामुळे ते लवकर खराब होत नाहीत.
४. व्हिनेगर किंवा बेकिंग सोडा युक्त पाण्याचा वापर: भाज्या स्वच्छ करताना तुम्ही पाण्यात थोडे व्हिनेगर किंवा बेकिंग सोडा घालून त्या ५-१० मिनिटे बुडवून ठेवू शकता. यामुळे भाज्यांवरील बॅक्टेरिया आणि घाण निघून जाते. त्यानंतर त्या स्वच्छ पाण्याने धुवून, पूर्णपणे कोरड्या करून साठवा.
५. फ्रिजचे योग्य तापमान: फ्रिजमध्ये भाज्या साठवण्यासाठी ३-५ अंश सेल्सिअस तापमान योग्य असते. भाज्या फ्रिजच्या व्हेजिटेबल ड्रॉवरमध्ये ठेवा आणि एकावर एक खूप जास्त भाज्या ठेवणे टाळा.
या सोप्या टिप्सचा वापर करून तुम्ही पावसाळ्यातही भाज्या ताज्या ठेवू शकता आणि अनावश्यक खर्च तसेच रोज बाजारात जाण्याचा त्रास टाळू शकता.







