इम्रान अत्तार

भोर: आंबाडे मार्गाचे नूतनीकरणाचे काम सुरू असून बहुतांशी रस्त्याचे काम पूर्ण झालेले आहे. मात्र मार्गावरील गोकवडी तसेच भोर शहरात शेजारील वाघजईनगर जवळ पावसाळ्याच्या तोंडावर संबंधित ठेकेदाराने रस्ता उकरून ठेवल्याने रस्त्याची दुरवस्था होऊन रस्ता खड्ड्यात गेला आहे. दरम्यान वाहनचालकांना या खड्डे व रस्त्यावरून वाहने चालवताना कसरत करावी लागत आहे.
मागील दोन वर्षांपासून भोर- आंबाडे रस्त्याचे काम सुरू आहे. मागील पावसाळ्यात रस्त्याचे काम सुरू असल्यामुळे वाहनचालकांना वाहने चालवताना दहा किलोमीटर पर्यंत मोठी कसरत करावी लागत होती. सध्या बहुतांशी रस्त्याचे काम पूर्ण झाले असले तरी निळकंठ -गोकवडी येथे तीनशे मीटर अंतराचा रस्ता रखडलेला असून रस्त्याचे काम दोन वर्षांपासून अपूर्ण आहे. तर वाघजाईनगर जवळ ठेकेदाराने सहाशे मीटरचा रस्ता पावसाळा सुरू होण्याच्या तोंडावर उकरून ठेवला आहे. या रस्त्यावर मोठमोठे खड्डे पडले असून खड्ड्यात पावसाचे पाणी साचल्याने खड्ड्यातून वाहने चालवताना नागरिकांना नाहक त्रास सहन करावा लागत आहे. दरम्यान अनेक वाहन चालकांना खड्ड्यातील पाण्यामुळे वाहने चालवताना अडथळा निर्माण होत आहे. काही जणांची वाहने तर खड्ड्यातील पाण्यात बंद पडत असल्याने वाहनचालकांना पाण्यात उतरून वाहने ढकलून बाहेर काढावी लागत असल्याचे चित्र आहे.

ठेकेदाराच्या मनमानी कारभारामुळे भोर-आंबाडे मार्गावरील वरवडी, पाले, बाजारवाडी, पळसोशी, बालवडी, खानापूर, हातनोशी, धावडी तसेच मांढरदेवी गडावर जाणाऱ्या शेकडोहून अधिक ये-जा करणाऱ्या वाहनचालकांना खड्डेमय व चिखली रस्त्याचा सामना करावा लागत आहे. लवकरात लवकर या रस्त्याची दुरुस्ती करावी अशी मागणी वाहन चालकांकडून होत आहे.
रस्त्याला तळ्याचे स्वरूप,अपघाताला निमंत्रण…
सध्या तालुक्यात सर्वत्र रिमझिम पाऊस सुरू असून पावसामुळे रस्त्यावर पाणी साचत आहे. त्यातच दुरावस्था झालेल्या रस्त्यावर मोठमोठे खड्डे असल्याने खड्ड्यांमध्ये पाणी साठत आहे. परिणामी रस्त्याला तळ्याचे स्वरूप आले असल्याने अपघाताला निमंत्रण दिल्याचे चित्र आहे.वाहनचालकांना वाहने चालवणे कठीण होत आहे असे संतप्त वाहन चालकांकडून सांगण्यात आले.







