पुणे: पुणे महानगर परिवहन महामंडळ (PMPML) मार्फत पुणे, पिंपरी-चिंचवड आणि पीएमआरडीए हद्दीतील लाखो नागरिकांना दररोज बससेवा पुरवली जाते. दररोज 10 ते 11 लाख प्रवासी या सेवेचा वापर करत असताना, प्रवाशांच्या सुरक्षेचा मुद्दा मात्र दुर्लक्षित राहिल्याचे समोर आले आहे. नुकत्याच तिकीटदरात करण्यात आलेल्या दुप्पट वाढीच्या पार्श्वभूमीवर, ‘नवराष्ट्र’च्या प्रतिनिधीने केलेल्या तपासणीत एक धक्कादायक बाब उघडकीस आली — PMPML च्या अनेक बसमध्ये सीसीटीव्ही कॅमेरेच बसवलेले नाहीत.

तपासणीदरम्यान असे दिसून आले की, काही बसमध्ये सीसीटीव्ही कॅमेरे अस्तित्वातच नाहीत. काही बसमध्ये कॅमेरे आहेत मात्र बंद अवस्थेत आहेत, तर काही ठिकाणी फक्त कॅमेऱ्याचे खोकले दिसून आले. ही बाब प्रवाशांच्या सुरक्षेच्या दृष्टीने अतिशय गंभीर मानली जात आहे. सीसीटीव्ही कॅमेरे हे महिलांच्या सुरक्षेसाठी अत्यंत महत्त्वाचे असून, यामुळे छेडछाड, पाकिटमार, वादविवाद अशा घटनांवर नियंत्रण ठेवता येते. मात्र, बसमध्ये ही सुविधा नसल्यामुळे अशा गुन्ह्यांचं प्रमाण वाढण्याची शक्यता आहे. रात्री प्रवास करणाऱ्या महिला प्रवाशांसाठी ही परिस्थिती अधिक भयावह ठरते. या प्रकारामुळे प्रवाशांमध्ये नाराजीचा सूर दिसून येत आहे. “तिकीटदर तर वाढवत आहेत, पण प्रवाशांच्या सुरक्षेचं काय?” असा संतप्त सवाल अनेक प्रवाशांनी उपस्थित केला आहे.
महिला प्रवाशाचे आवाहन

महिला प्रवासी साक्षी पाटील यांनी सांगितलं, “सीसीटीव्ही कॅमेरे महिला सुरक्षेसाठी खूप महत्त्वाचे आहेत. अनेक बसमध्ये हे कॅमेरेच नाहीत. चोरी किंवा अन्य चुकीचे प्रकार घडतात. विशेषतः रात्री प्रवास करताना भीती वाटते. त्यामुळे PMPML प्रशासनाने या विषयाकडे तातडीने लक्ष देणं गरजेचं आहे.”
प्रशासनाचे दुर्लक्ष – प्रवाशांचा जीव धोक्यात
PMPML ने नुकतीच तिकीट दरात मोठी वाढ केली असली, तरी प्रवाशांच्या मूलभूत सुरक्षेकडे पुरेसे लक्ष देण्यात आलेले नाही, ही बाब गंभीर आहे. हजारो प्रवाशांचा प्रवास दररोज या बसमधून होत असताना, सीसीटीव्हीची अनुपस्थिती ही व्यवस्थेतील गंभीर त्रुटी दर्शवते.







