भोपाळ : सक्तवसुली(ईडी) संचालनालयने एका कंपनीवर छापेमारी केल्यानंतर संबंधित कंपनीच्या संचालिकेने विष प्राशन केल्याचा धक्कादायक प्रकार समोर आला आहे. बुधवारी ईडीकडून कंपनीच्या विविध ठिकाणांवर छापेमारी करण्यात आली. यानंतर ईडीने कंपनीची मालमत्ता देखील जप्त केली होती. या कारवाईनंतर कंपनीच्या 31 वर्षीय संचालिकेने थेट विष प्राशन करून आत्महत्या करण्याचा प्रयत्न केला आहे. ईडीच्या छापेमारीनंतर दुसऱ्याच दिवशी एका बड्या कंपनीच्या संचालिकेकडून अशाप्रकारे आत्महत्या करण्याचा प्रयत्न करण्यात आल्याने उद्योगजगतात एकच खळबळ उडाली आहे. या घटनेची दखल पोलिसांकडून घेण्यात आली आहे. पोलीस पुढील तपास करत आहे.
याबाबत अधिक माहिती अशी की, पायल मोदी असं विष प्राशन करणाऱ्या महिलेचं नाव आहे. त्या मध्य प्रदेशातील भोपाळ येथील जयश्री गायत्री फूड्स प्रायव्हेट लिमिटेडच्या संचालिका आहेत. पायल मोदी यांचे पती किशन मोदी हे या कंपनीचे मालक आहेत. बुधवारी ईडीने भोपाळ, सेहोर आणि मुरैना जिल्ह्यातील जयश्री गायत्री फूड प्रोडक्ट्स प्रायव्हेट लिमिटेडच्या ठिकाणांवर छापे टाकले होते. या छापेमारीनंतर पायल मोदी यांनी अटकेच्या भीतीपोटी विष प्राशन केल्याचं बोललं जात आहे. भोपाळमधील एका खासगी रुग्णालयात त्यांच्यावर उपचार सुरू आहेत.
ईडीने बुधवारी केलेल्या छापेमारीत ईडीला विविध कंपन्या आणि कुटुंबातील सदस्यांच्या नावावर ६६ कोटी रुपयांची बेहेशोबी मालमत्ता आढळून आली आहे. शिवाय पायल मोदी यांच्या कुटुंबाकडे 25 लाख रुपये रोख रक्कम, बीएमडब्ल्यू आणि फॉर्च्युनर सारख्या आलिशान कारही सापडल्या आहेत. या गाड्या ईडीने जप्त केल्या असून याशिवाय ईडीकडून कुटुंबाच्या एफडीचे 6.26 कोटी रुपये देखील गोठवण्यात आले आहेत.
ईडीकडून दावा करण्यात आला आहे की, जयश्री गायत्री फूड्स प्रायव्हेट लिमिटेडकडून विविध बनावट प्रमाणपत्रांचा वापर भेसळयुक्त दूध उत्पादने निर्यात करण्यासाठी केला जात होता. तसेच ही प्रमाणपत्रे मूळतः इतर कंपन्यांना जारी करण्यात आली होती किंवा ती फसवणूक करून मिळवण्यात आली होती. ईडीने किशन मोदी यांच्या विविध कंपन्या आणि कुटुंबातील सदस्यांच्या नावे असलेल्या 66 कोटी रुपयांच्या स्थावर मालमत्तेचे कागदपत्रे आणि इतर कागदपत्रे देखील जप्त केली आहेत.
