नवी दिल्ली: महाराष्ट्राच्या (Shiv Sena Case) राजकारणाची दिशा ठरवणारा शिवसेना सत्तासंघर्ष आणि ‘धनुष्यबाण’ चिन्हाचा वाद आता एका अत्यंत वेगळ्या वळणावर येऊन ठेपला आहे. गेल्या तीन वर्षांपासून सर्वोच्च न्यायालयात प्रलंबित असलेल्या या प्रकरणाची आज होणारी सुनावणी पुढे ढकलण्यात आली असून, आता शुक्रवारी, २३ जानेवारी रोजी यावर निर्णायक सुनावणी होणार आहे. विशेष म्हणजे, याच दिवशी शिवसेनाप्रमुख दिवंगत बाळासाहेब ठाकरे यांची जयंती असल्याने त्यादिवशी नेमकी कोणाच्या बाजूने निकाल लागणार याकडे सर्वांचे लक्ष लागले आहे.
सर्वोच्च न्यायालयाच्या कामकाजाच्या यादीत शिवसेनेचे हे प्रकरण ३७ व्या क्रमांकावर होते. सरन्यायाधीश सूर्यकांत नियमित कामकाज पाहणार होते, त्यानंतर ते ‘अरवली डोंगररांगा’ या दुसऱ्या एका महत्त्वाच्या प्रकरणाच्या विशेष सुनावणीत व्यस्त राहणार होते. दरम्यान, अत्यंत गुंतागुंतीच्या आणि दीर्घ युक्तिवादाची गरज असलेल्या शिवसेना सत्तासंघर्ष प्रकरणाला आज पुरेसा वेळ मिळणे शक्य नसल्याने, न्यायालयाने ही सुनावणी शुक्रवारी घेण्याचा निर्णय घेतला.
न्यायालयाने दोन्ही बाजूंच्या (शिंदे गट आणि ठाकरे गट) वकिलांना आपली बाजू मांडण्यासाठी प्रत्येकी ३-३ तासांचा वेळ दिला जाणार आहे. या वेळेत ‘खरी शिवसेना कोणाची?’ आणि निवडणूक चिन्हावर कोणाचा अधिकार? हे सिद्ध करण्याचे मोठे आव्हान दोन्ही गटांच्या कायदेतज्ज्ञांसमोर असेल. दरम्यान, शुक्रवारी निकाल लागणार कि सुनावली पुढे ढकलणार ते पाहणे महत्वाचे ठरणार आहे.
