दिल्ली: दिल्लीतील कश्मीरी गेट परिसरात १६ वर्षीय विद्यार्थिनीवर धावत्या स्लीपर बसमध्ये सामूहिक बलात्कार झाल्याची धक्कादायक घटना समोर आली आहे. ४ ऑगस्टच्या रात्री ही घटना घडली. या प्रकरणी दिल्ली पोलिसांनी बस चालक कुलदीप आणि कंडक्टर संदीप यांना अटक केली आहे. पीडित मुलगी उत्तर प्रदेशातील मैनपुरी जिल्ह्यातील रहिवासी असल्याची माहिती पोलिसांनी दिली.
मिळालेल्या माहितीनुसार, विद्यार्थिनी कुटुंबीयांवर नाराज होऊन घरातून निघाली होती. नोएडामध्ये राहणाऱ्या चुलत भावाकडे जाण्याच्या प्रयत्नात ती मुसळधार पाऊस आणि अंधारामुळे ग्रेटर नोएडातील परी चौक येथे रस्ता चुकली. त्यावेळी तेथून जाणाऱ्या रिकाम्या स्लीपर बसला तिने हात दाखवून थांबवले.
चालक आणि कंडक्टरने तिला नोएडा सेक्टर-६३ येथे जाणार असल्याचे सांगून बसमध्ये घेतले. मात्र, बस सुरू झाल्यानंतर काही वेळातच तिच्यासोबत गैरवर्तन करण्यात आल्याचा आरोप आहे. त्यानंतर चालक आणि कंडक्टरने तिच्यावर अत्याचार केला. विरोध केल्यास जीवे मारण्याची धमकी दिल्याचेही पीडितेने पोलिसांना सांगितल्याची माहिती आहे.
परी चौक ते कश्मीरी गेट या सुमारे ४७ किलोमीटरच्या प्रवासादरम्यान ही घटना घडल्याचा आरोप आहे. रात्री उशिरा आरोपींनी विद्यार्थिनीला कश्मीरी गेट बस अड्ड्याजवळील रिंग रोड परिसरात उतरवून तेथून पळ काढला. त्यानंतर पीडितेने कश्मीरी गेट पोलिसांशी संपर्क साधत घडलेला प्रकार सांगितला.
पोलिसांनी तपासाची चक्रे वेगाने फिरवत तिमारपूर येथील बस पार्किंगमधून दोन्ही आरोपींना ताब्यात घेतले. घटनेत वापरण्यात आलेली स्लीपर बसही पोलिसांनी जप्त केली असून तिची फॉरेन्सिक तपासणी करण्यात येत आहे. पोलिसांच्या माहितीनुसार, बसमध्ये बिघाड झाल्यानंतर ती दुरुस्तीसाठी सूरजपूर येथील वर्कशॉपमध्ये नेण्यात आली होती. दुरुस्ती झाल्यानंतर चालक आणि कंडक्टर बस घेऊन तिमारपूरच्या दिशेने जात होते. या प्रकरणाचा पुढील तपास दिल्ली पोलिसांकडून सुरू आहे.
