मुंबई: राष्ट्रवादी काँग्रेस (शरदचंद्र पवार) पक्षाचे प्रमुख शरद पवार यांना छातीत वेदना होत असल्याने रुग्णालयात दाखल करण्यात आले. प्रकृतीत सुधारणा झाल्यानंतर त्यांना डिस्चार्ज देण्यात आला होता. मात्र, आता त्यांना मुंबईतील ब्रीच कँडी रुग्णालयात दाखल करण्यात आल्याची माहिती समोर आली आहे. त्यांना प्लुरिटिक चेस्ट पेनचा त्रास असल्याचे सांगितले जात आहे.
काय आहे प्लुरिटिक चेस्ट पेन?
प्लुरिटिक चेस्ट पेन म्हणजे श्वास घेताना छातीत टोचल्यासारखी किंवा तीव्र वेदना होणे. फुफ्फुसांच्या बाहेरच्या बाजूला प्लुरा नावाचा दोन थरांचा पातळ पडदा असतो. या थरांमध्ये थोडे द्रव असते. त्यामुळे श्वास घेताना फुफ्फुसांची हालचाल सहज होते. मात्र, या पडद्याला सूज किंवा दाह झाल्यास श्वास घेताना वेदना जाणवू शकतात.
या त्रासात खोल श्वास घेताना, खोकताना, शिंकताना किंवा हसतानाही छातीत दुखू शकते. काही रुग्णांना श्वास घेण्यास त्रास होतो. वेदना कधी कधी खांद्यापर्यंत किंवा मानेपर्यंतही पसरू शकतात.
कशामुळे होतो हा त्रास?
व्हायरल इन्फेक्शन, फ्लू, न्यूमोनिया आणि फुफ्फुसांमधील संसर्गामुळे प्लुराला सूज येऊ शकते. याशिवाय फुफ्फुसांकडे जाणाऱ्या रक्तवाहिनीत रक्ताची गुठळी अडकणे म्हणजे पल्मोनरी एम्बोलिज्म, तसेच फुफ्फुस आणि छातीच्या भिंतीमध्ये हवा साठणे म्हणजे न्यूमोथोरॅक्स, हीदेखील गंभीर कारणे असू शकतात.
हृदयाभोवती असलेल्या पातळ पडद्याला सूज आल्यासही छातीत वेदना होऊ शकतात. अशा वेदना झोपल्यावर वाढू शकतात आणि पुढे झुकून बसल्यावर कमी होऊ शकतात.
