उत्तर प्रदेश: दिल्लीमध्ये राहून स्पर्धा परीक्षेचा (UPSC) अभ्यास करणाऱ्या एका तरुणीला जाळ्यात ओढून तिच्यावर अत्याचार केल्याची संतापजनक घटना समोर आली आहे. पीडित तरुणीला तब्बल 3 दिवस डांबून ठेवण्यात आले होते. विशेष म्हणजे, अनोळखी व्यक्तीने नाही, तर तिच्याच एका जुन्या ओळखीच्या तरुणाने आपल्या मित्रांच्या मदतीने तिच्यावर सामुहिक बलात्कार केला. लखनौमधील एका खोलीत तिला डांबून, गुंगीचे औषध मिसळलेली कॉफी पाजली गेली आणि नराधमांनी आळीपाळीने तिच्या शरीराचे लचके तोडले.
तरुणी सुट्ट्या संपवून 15 May रोजी सुहेलदेव एक्सप्रेसने दिल्लीला जाण्यासाठी निघाली होती. प्रवासादरम्यान तिने ओळखीचा तरुण शिवम यादव याला मेसेज केला. ट्रेन लखनौच्या चारबाग स्टेशनवर येताच शिवम त्याचा मित्र शनी यादव याला घेऊन तिथे पोहोचला. त्यांनी जबरदस्तीने तरुणीला ट्रेनमधून उतरवले आणि सुशांत गोल्फ सिटी भागातील एका खोलीत घेऊन गेले.
शिवमने तरुणीला बेशुद्ध करून पहिल्यांदा अत्याचार केला. पुढच्याच दिवशी, म्हणजेच 16 May रोजी शनीनेही तिच्यावर बळजबरी केली. 17 May रोजी या गुन्ह्यात आणखी एका अनोळखी मुलाला सामील करून घेण्यात आले. 18 May च्या दुपारपर्यंत या तिघांनी तिला बंधक ठेवून छळ केला.
शेवटी संध्याकाळी तिला पुन्हा त्याच ट्रेनमध्ये बसवून दिले. ट्रेन बरेली स्टेशनजवळ आली तेव्हा पीडितेने सर्व घडलेला प्रकार वडिलांना सांगितला. याप्रकरणी दिल्लीच्या आनंद विहार पोलीस ठाण्यात याप्रकरणी ‘झिरो एफआयआर’ नोंदवण्यात आली असून संतापलेल्या वडिलांनी आरोपींना कठोर शिक्षेची मागणी केली आहे.
