UP Road Accident : उत्तरप्रदेशमधून एक धक्कादायक घटना समोर येत आहे. उत्तरप्रदेशच्या कानपूर- आग्रा महामार्गावर एक भरधाव ट्रक थेट चहाच्या दुकानात घुसल्याने मोठा अपघात झाला आहे. या अपघातात मामा- भाच्यासह चौघांचा मृत्यू झाला असून दोन जण गंभीर जखमी झाले आहेत. घटनेची माहिती मिळताच पोलिसांनी घटनास्थळी धाव घेत जखमींना उपचारासाठी रुग्णालयात दाखल करण्यात आलं आहे.
मिळालेल्या अधिक माहितीनुसार, इटावामध्ये भरधाव ट्रक झारखंडमधून केबल्स भरून दिल्लीच्या दिशेने जात असताना कानपूर- आग्रा महामार्गावर चालकाचे नियंत्रण सुटल्याने हा अपघात झाला आहे. भरधाव वेगात येणारा ट्रक फुटपाथ तोडून एका चहाच्या दुकानात शिरल्याने मोठी दुर्घटना घडली. शनिवारी १६, डिसेंबर रात्री १०.३० वाजण्याच्या सुमारास ही घटना घडली.
यावेळी दुकानात असलेल्या चार जणांचा ट्रकखाली दबून मृत्यू झाला. तर एक जण गंभीर जखमी झाला. ट्रॉलीने धडक दिल्याने दुचाकीस्वारही जखमी झाला. घटनेची माहिती मिळताच पोलीस अधिकारी आणि सीओ सिटी घटनास्थळी पोहोचले. त्यांनी क्रेन आणि जेसीबी मागवून जखमींना बाहेर काढण्यात आले. अपघातामध्ये मृत झालेल्यांचे मृतदेह शवविच्छेदनगृहात पाठवण्यात आले असून जखमींना जिल्हा रुग्णालयात पाठवण्यात आले आहे.
