ओडिशा : ओडिशाममधील भुवनेश्वरममधून एक संतापजनक बातमी समोर आली आहे. लष्करी अधिकाऱ्यावर प्राणघातक हल्ला करून आणि त्याच्या होणाऱ्या पत्नीचा पोलिस ठाण्यात भयंकर लैंगिक छळ झाल्याची घटना उघडकीस आली आहे. ओडिशामधील भुवनेश्वरमधील भरतपूर पोलिस ठाण्यात हा प्रकार घडला असून पीडित तरुणी ही पोलिस स्टेशनमध्ये लष्कराच्या अधिकाऱ्यासह तक्रार देण्यासाठी गेली होती. ओडिशा पोलिसांनी या प्रकरणातील प्रभारी निरीक्षकासह पाच पोलिसांना निलंबित केले आहे.
ओडिशा पोलिसांनी दिलेल्या माहितीनुसार या प्रकरणात आरोपी भरतपूर पोलिस स्टेशनचे प्रभारी निरीक्षक (आयसीसी) दिनकृष्ण मिश्रा, उपनिरीक्षक बैसालिनी पांडा, सहायक उपनिरीक्षक सलिलामोयी साहू आणि सागरिका रथ आणि कॉन्स्टेबल बलराम हांडा यांना निलंबित करण्यात आले आहे.
..आणि तिचे अंतर्वस्त्र काढले
पीडितेच्या सांगण्यानुसार, पोलीस ठाण्यातील पोलिसांनी अधिकाऱ्याशी गैरवर्तन केले. लष्करी अधिकारी असूनही त्यांना लॉकअपमध्ये बंद करण्यात आले. पीडितेने विरोध केला असता तिला मारहाण करून हात पाय बांधण्यात आले. धक्कादायक बाब म्हणजे एका पुरुष अधिकाऱ्याने तिचे अंतर्वस्त्र काढले. त्यानंतर तिच्या छातीवर लाथ मारली. तेवढ्यात प्रभारी निरीक्षक आले. त्याने पीडितेची पॅन्ट खाली खेचली. त्यानंतर त्याचे प्रायव्हेट पार्ट दाखवून अश्लील बोलले. ही घटना 15 सप्टेंबर रोजी घडली आहे. पोलिसांनी पीडितेला गैरवर्तनाच्या आरोपाखाली अटक केली होती.19 सप्टेंबर रोजी उच्च न्यायालयातून जामीन मिळाल्यानंतर त्यांनी हा खुलासा केला आहे.
पीडितेला बेदम मारहाण..
पीडितेने सांगितले की, रविवारी रात्री 1 वाजण्याच्या सुमारास ती रेस्टॉरंट बंद करून आर्मी ऑफिसरसोबत घरी परतत होती. वाटेत काही तरुणांनी त्यांचा मार्ग अडवण्याचा प्रयत्न करून त्यांना त्रास देण्यास सुरुवात केली. पोलिसांकडे तक्रार करण्यासाठी आणि मदत मागण्यासाठी त्यांनी भरतपूर पोलिस ठाणे गाठले. त्यांनी तक्रार देण्याचा प्रयत्न केला असता सिव्हिल ड्रेसमध्ये उपस्थित असलेल्या महिला पोलिसाने त्यांना शिवीगाळ करण्यास सुरुवात केली. काही वेळाने आणखी काही पोलीस गस्तीवर असलेल्या वाहनातून पोलीस ठाण्यात पोहोचले.
पीडित तरुणी पुढे म्हणाली की, ‘मग काय झाले माहीत नाही, त्यांनी आर्मी ऑफिसरला लॉकअपमध्ये बंद केले. लष्कराच्या अधिकाऱ्याला ते ताब्यात ठेवू शकत नाहीत, हे बेकायदेशीर आहे, असे मी म्हटल्यावर दोन महिला पोलिस कर्मचाऱ्यांनी माझे केस पकडून बेदम मारहाण करण्यास सुरुवात केली.
पुरुष अधिकाऱ्यांकडून तिचे शोषण..
पीडित लष्करी अधिकाऱ्याची होणारी पत्नी म्हणाली की, एका महिला पोलिसाने माझी मान पकडण्याचा प्रयत्न केला तेव्हा मी तिचा हात चावला. यानंतर त्यांनी माझे हात माझ्या जॅकेटने बांधले. माझे पाय एका लेडी कॉन्स्टेबलच्या स्कार्फने बांधलेले होते. काही वेळाने एक मेल ऑफिसर आला. त्याने माझी अंतर्वस्त्रे काढली आणि माझ्या छातीवर लाथ मारू लागला. सकाळी सहाच्या सुमारास प्रभारी निरीक्षक आले. त्याने माझी पॅन्ट खाली ओढली. त्यानंतर त्याने त्याची पॅन्ट खाली खेचली, त्याचे प्रायव्हेट पार्ट दाखवले आणि अश्लील बोलले. यावेळी मी मदतीसाठी जोरजोरात ओरडत होती.
पीडितेचा शारीरिक छळ झाल्याचे स्पष्ट…
वैद्यकीय तपासणीत पीडितेचा शारीरिक छळ झाल्याची पुष्टी झाली असून तिच्यावर सध्या एम्स-भुवनेश्वरमध्ये उपचार सुरू आहेत. वैद्यकीय तपासणीत तिच्यावर शारिरीक अत्याचार झाल्याची पुष्टी झाली आहे. पोलीस महासंचालक वायबी खुरानिया यांनी या प्रकरणाचा तपास गुन्हे शाखेकडे सोपवला असल्याचे सांगितले.
