श्रीनगर: जम्मू-काश्मीरमध्ये काँग्रेस आणि नॅशनल कॉन्फरन्सचे आघाडी सरकार स्थापन होणार आहे. ओमर अब्दुल्ला हेच जम्मू-काश्मीरचे पुढील मुख्यमंत्री असतील, असे नॅशनल कॉन्फरन्सचे नेते फारुख अब्दुल्ला यांनी म्हटले आहे. फारुख अब्दुल्ला यांनी म्हटले आहे की, जनतेने आपल्या आदेशाद्वारे दाखवून दिले आहे की, ते 5 ऑगस्टचा निर्णय (कलम 370 हटवण्याचा निर्णय) स्वीकारत नाहीत. जम्मू-काश्मीरमधील बेरोजगारी, महागाई आणि अंमली पदार्थांचा व्यापार संपवण्यासाठी आम्ही काम करू, असेही ते म्हणाले.
जम्मू-काश्मीर निवडणुकीत नॅशनल कॉन्फरन्स हा सर्वात मोठा पक्ष म्हणून समोर आला आहे. तर भाजप दुसऱ्या क्रमांकावर आहे. फारुख अब्दुल्ला यांनी निकालाबद्दल जम्मू-काश्मीरमधील सर्व जनतेचे आभार मानले असून ओमर अब्दुल्ला यांनी बडगाम आणि गांदरबल या दोन्ही जागांवरून निवडणूक लढवली आहे आणि गंदरबलमध्येही ते विजयी झाले आहेत, असे म्हटले आहे.
जम्मू-काश्मीरमध्ये दहा वर्षांनंतर निवडणुका
जम्मू-काश्मीरमध्ये 10 वर्षांनंतर निवडणुका होत आहेत, त्याआधी 2014 मध्ये विधानसभा निवडणुका झाल्या होत्या. त्यानंतर भाजप आणि पीडीपीने मिळून सरकार स्थापन केले होते, 2018 च्या अखेरीस दोन्ही पक्षांची युती तुटली. त्यानंतर काही महिन्यांनी 5 ऑगस्ट 2019 रोजी केंद्र सरकारने जम्मू-काश्मीरमधून कलम 370 हटवले आणि लडाख वेगळे केले. तसेच जम्मू-काश्मीरला केंद्रशासित प्रदेश घोषित केले. जम्मू-काश्मीरला पूर्ण राज्याचा दर्जा हा या निवडणुकीत सर्वात महत्त्वाचा मुद्दा ठरला आहे.
निकालाबद्दल बोलायचे झाले, तर आतापर्यंत 90 पैकी 86 जागांचे निकाल आले आहेत. नॅशनल कॉन्फरन्स 41 जागा जिंकून एका जागेवर आघाडीवर आहे, तर भाजपने 27 जागा जिंकल्या असून आता पक्ष 2 जागांवर आघाडीवर आहे. तर काँग्रेसला 6 जागा मिळाल्या आहेत. याशिवाय मेहबुबा मुफ्ती यांचा पक्ष पीडीपीने 3 जागा जिंकल्या आहेत. माजी मुख्यमंत्री मेहबूबा मुफ्ती यांची मुलगी इल्तिजा मुफ्ती यांना निवडणुकीत पराभवाला सामोरे जावे लागले आहे. त्याचवेळी जम्मू-काश्मीर विधानसभा निवडणुकीत आम आदमी पार्टीचे खातेही उघडले असून, आपचे उमेदवार मेहराज मलिक यांनी डोडा मतदारसंघात 4538 मतांनी विजय मिळवला आहे.
