Nupur Bora: आसाम सिव्हिल सर्व्हिस (एसीएस) अधिकारी नुपूर बोरा त्यांच्या घरातून सुमारे 2 कोटी रुपये रोकड आणि दागिने जप्त केल्यानंतर सोमवारी अटक करण्यात आली आहे. मुख्यमंत्र्यांच्या विशेष दक्षता कक्षाच्या छाप्यांमध्ये ही कारवाई करण्यात आली.
जमवलेल्या संपत्तीमध्ये गुवाहाटी येथील निवासस्थानातून सुमारे 94 लाख रुपये रोकड आणि मौल्यवान दागिने तर बारपेटा येथील भाड्याच्या घरातून आणखी 10 लाख रुपये रोकड जप्त करण्यात आली आहे.
आसामचे मुख्यमंत्री हिमंता बिस्वा शर्मा (Chief Minister Himanta Biswa Sharma on Nupur Bora) यांनी या प्रकरणी सांगितले की, नुपूर बोरा यांच्यावर वादग्रस्त जमिनीच्या प्रकरणाशी संबंध असल्याच्या आरोपांवरून सहा महिन्यांपासून गुप्तपणे पाळत ठेवण्यात आली होती. सध्या या प्रकरणाची चौकशी सुरू आहे.
कोण आहे नुपूर बोरा? (Nupur Bora)
नुपूर बोरा 2019 मध्ये आसाम नागरी सेवेत रुजू झाल्या असून त्या सध्या 34 वर्षांच्या आहेत. त्यांचा जन्म 31 मार्च 1989 रोजी झाला. त्या गोलाघाट जिल्ह्यातील असून, कामरूप जिल्ह्यातील गोरोईमारी येथे सर्कल ऑफिसर म्हणून कार्यरत होत्या.
त्यांनी गुवाहाटी विद्यापीठातून इंग्रजी साहित्यात कला शाखेची पदवी घेतली असून कॉटन कॉलेजमध्ये शिक्षण पूर्ण केले आहे. नागरी सेवेत येण्यापूर्वी त्यांनी जिल्हा शिक्षण व प्रशिक्षण संस्थेत (DIET) व्याख्याता म्हणून काम केले आहे.
त्यांनी कार्बी आंगलोंग येथे सहाय्यक आयुक्त म्हणून प्रशासनिक कारकिर्दीची सुरुवात केली आणि मार्च 2019 ते जून 2023 दरम्यान ही पदे सांभाळली. नंतर जून 2023 पासून बारपेटा येथे सर्कल ऑफिसर म्हणून नियुक्ती झाली आणि नंतर कामरूप येथे बदली झाली.
सहा वर्षांच्या सेवेत नुपूर बोरा यांनी अधिकृत पगाराच्या तुलनेत प्रचंड संपत्ती जमवली असल्याचा संशय वर्तवण्यात येत आहे. त्यांच्या मालमत्तेत मोठ्या प्रमाणात रोख रकमाही असल्याचा आरोप आहे.
गोलाघाट येथील रहिवासी नुपूर बोरा 2019 मध्ये नागरी सेवेत प्रवेश करताना एक मेहनती आणि कडक शिस्तीच्या अधिकारी म्हणून ओळखल्या जात होत्या. मात्र, गेल्या सहा महिन्यांपासून त्यांच्या विरोधात भ्रष्टाचार आणि बेकायदेशीर व्यवहारांशी संबंधित आरोपांच्या आधारे गुप्तपणे पाळत ठेवण्यात आली होती.
समोर आलेल्या माहितीनुसार, त्यांनी मोठ्या प्रमाणात पैसे स्वीकारल्याचे सांगितले जात असून, सध्या या प्रकरणाचा तपास सुरू असल्याने त्या देशभरात चर्चेत आहेत.
