नवी दिल्ली : माता वैष्णोदेवीच्या दर्शनासाठी जाणा-या भाविकांनी भरलेल्या बसवर दहशतवाद्यांनी गोळीबार केल्याची घटना घडली आहे. या हल्ल्यात आतापर्यंत 10 जणांचा मृत्यू झाला असून त्याच्या चौकशीसाठी राष्ट्रीय तपास यंत्रणेचे (एनआयए) पथक जम्मूला पोहोचले असल्याचे अधिका-यांनी सोमवारी सांगितले.
स्थानिक पोलीसांशी समन्वय साधून तपास सुरु झाला आहे. सुरक्षा दलांनीही शोध मोहीम सुरु केली असून अनेक भाग ताब्यात घेण्यात आले आहेत.
मिळालेल्या माहितीनुसार, शिवखोरी मंदिराहून कटरा येथील माता वैष्णोदेवीच्या दर्शनासाठी जाणा-या भाविकांच्या बसवर दहशतवाद्यांनी रविवारी (ता.09) पोनी भागातील तीर्यत गावाजवळ गोळीबार केला. यात्रेकरुंनी भरलेली बस शिवखोडीहून कटरा येथे जात असताना दहशतवादी हल्ला झाला. दहशतवाद्यांनी प्रथम बसवर अंदाधुंद गोळीबार केला, त्यामुळे बस चालविणा-या चालकाला गोळी लागली. या घटनेत 10 भाविकांचा मृत्यू झाला असून 30-35 जण जखमी झाले आहेत.
