नवी दिल्ली: लोकसभा निवडणुकीच्या पार्श्वभूमीवर काँग्रेसने गुरुवारी केंद्रीय निवडणूक समितीची बैठक बोलावली आहे. या बैठकीत काँग्रेस उमेदवारांच्या नावांची पहिली यादी निश्चित करणार असल्याचे सांगण्यात येत आहे.
काँग्रेस अध्यक्ष मल्लिकार्जुन खर्गे हे केंद्रीय निवडणूक समितीचे अध्यक्ष आहेत, ज्यात माजी अध्यक्ष सोनिया गांधी आणि राहुल गांधी यांचाही समावेश आहे. काँग्रेस नेते जयराम रमेश यांनी ट्विट केले की, काँग्रेस केंद्रीय निवडणूक समितीची पहिली बैठक 7 मार्च रोजी सायंकाळी 6 वाजता होणार आहे. यामध्ये लोकसभा निवडणुकीच्या उमेदवारांची नावे निश्चित केली जाणार आहेत.
जाहीरनाम्याचा मसुदा तयार
लोकसभा निवडणुकीसाठी पक्षाचा जाहीरनामा तयार करण्याची जबाबदारी सांभाळणाऱ्या काँग्रेस पॅनलनेही मसुदा तयार केला आहे. आता काँग्रेस कार्यकारिणी यावर चर्चा करणार आहे. जाहीरनामा समितीचे अध्यक्ष आणि माजी अर्थमंत्री पी चिदंबरम म्हणाले की, ते काँग्रेस अध्यक्षांसमोर मसुदा सादर करणार आहेत.
त्यांनी सांगितले की, आम्ही जाहीरनाम्याचा मसुदा तयार केला आहे. आता तो काँग्रेस कार्यकारिणीसमोर मांडला जाणार आहे. समितीच्या बैठकीत याला अंतिम स्वरूप दिले जाईल. त्यानंतर हा काँग्रेस पक्षाचा जाहीरनामा बनेल. उद्या ते काँग्रेस अध्यक्षांसमोर मांडणार असल्याचे त्यांनी सांगितले.
प्रियंका रायबरेलीतून निवडणूक लढवू शकतात
यापूर्वी मीडिया रिपोर्ट्समध्ये दावा करण्यात आला होता की, यावेळी प्रियांका गांधी रायबरेलीमधून निवडणूक लढवू शकतात. ही जागा काँग्रेसची पारंपरिक जागा आहे. सध्या सोनिया गांधी येथून लोकसभेच्या खासदार आहेत. मात्र यावेळी सोनिया राजस्थानमधून राज्यसभेत पोहोचल्या आहेत. अशा परिस्थितीत प्रियांका गांधी या जागेवरून निवडणूक लढवणार असल्याची चर्चा आहे. तर राहुल गांधी पुन्हा एकदा अमेठी आणि वायनाडमधून निवडणूक लढवू शकतात.
भाजपने 195 उमेदवारांची केली नावे जाहीर
एप्रिल-मे महिन्यात देशात सार्वत्रिक निवडणुका होणार आहेत. यापूर्वी 2 मार्च रोजी भाजपने 195 उमेदवारांची नावे जाहीर केली होती. भाजपच्या पहिल्या यादीत 34 खासदारांची तिकिटे रद्द करण्यात आली आहेत. तर 34 केंद्रीय मंत्री आणि 3 माजी मुख्यमंत्र्यांना या यादीत उमेदवारी देण्यात आली आहे. भाजपच्या पहिल्या यादीत 24 महिलांचीही नावे आहेत. पीएम मोदी वाराणसीतून, अमित शहा गांधीनगरमधून, राजनाथ सिंह लखनऊमधून आणि स्मृती इराणी अमेठीतून निवडणूक लढवत आहेत.
