काँग्रेसने मणिशंकर अय्यर यांचे तिकीट कापले, जाणून घ्या त्यांच्या जागेवरून कोणाला दिली उमेदवारी

नवी दिल्ली: आगामी लोकसभा निवडणूकीसाठी काँग्रेसने नुकत्याच जाहीर केलेल्या उमेदवार यादीत पक्षाचे दिग्गज नेते आणि माजी केंद्रीय मंत्री मणिशंकर अय्यर यांचे तिकीट कापण्यात आले आहे. तामिळनाडूच्या पारंपारिक मायादुथुराई लोकसभा मतदारसंघातून काँग्रेसने मणिशंकर अय्यर यांच्या जागी नवा चेहरा उभा केला आहे. काँग्रेसने वकील आर सुधा यांना २०२४ च्या लोकसभा निवडणुकीसाठी या जागेवरून उमेदवारी दिली आहे. आर सुधा या तामिळनाडू महिला काँग्रेसच्या विद्यमान अध्यक्षाही आहेत.

अखिल भारतीय महिला काँग्रेसच्या अध्यक्षा अलका लांबा यांनी आर सुधा यांना उमेदवार म्हणून घोषित केल्याबद्दल आनंद व्यक्त केला आहे. अलका लांबाने सोशल मीडिया प्लॅटफॉर्म ‘X’ वर पोस्ट देखील केली आहे. त्या म्हणाल्या की, तमिळनाडू महिला काँग्रेसच्या अध्यक्षा आर सुधा यांना मायलादुथुराई मतदारसंघातून काँग्रेस उमेदवार म्हणून घोषित केल्याबद्दल पक्षाचे राष्ट्रीय अध्यक्ष मल्लिकार्जुन खरगे, माजी अध्यक्षा सोनिया गांधी आणि राहुल गांधी यांचे मनापासून आभार. सर्वोच्च नेतृत्वाबद्दल कृतज्ञता व्यक्त करत अलका लांबा यांनी सुधा यांना शुभेच्छा दिल्या.