श्रीनगर: जम्मू आणि काश्मीरच्या विधानसभेच्या 90 जागांवर मतमोजणी सुरू आहे. मात्र, मतमोजणी सुरू असतानाच आम आदमी पक्षासाठी मोठी बातमी समोर आली आहे. या निवडणुकीत पक्षाने खाते उघडले आहे. राज्याच्या डोडा विधानसभा मतदारसंघातून आम आदमी पक्षाचे उमेदवार मेहराज मलिक यांनी विजयाचा झेंडा फडकावला आहे. त्यांनी भारतीय जनता पक्षाच्या गजयसिंह राणा यांचा चार हजारांहून अधिक मतांनी पराभव केला आहे. त्यांच्या विजयासह आम आदमी पक्षाने पाचव्या राज्यात विधानसभेची जागा जिंकली आहे. यापूर्वी दिल्ली, पंजाब, गुजरात आणि गोवा विधानसभा निवडणुकीत आम आदमी पक्षाने काही जागा जिंकल्या होत्या.
आम आदमी पार्टीचे संयोजक आणि दिल्लीचे माजी मुख्यमंत्री अरविंद केजरीवाल यांनी मेहराज यांचे विजयाबद्दल अभिनंदन केले आहे. केजरीवाल यांनी त्यांच्या एक्स पेजवर लिहिले की, ‘आप’चे उमेदवार मेहराज मलिक यांनी डोडा विधानसभा मतदारसंघातून भाजपचा पराभव केल्याबद्दल त्यांचे अभिनंदन. तुम्ही चांगली निवडणूक लढवली, असंही केजरीवाल म्हणाले.
विजयावर काय म्हणाले मेहराज मलिक?
विजयानंतर मेहराज मलिक म्हणाले की, ही पहिली पायरी असून आणखी पुढे जायचे आहे. ते म्हणाले, ‘जम्मू-काश्मीरमध्ये सर्वत्र निवडणूक लढवता आली नाही, ही आमची कमतरता होती. हा जनतेचा विजय आहे. आम्ही लोकांसाठी लढण्यासाठी आलो आहोत. आता जम्मू-काश्मीरची विधानसभा होणार असून तिथे मेहराज मलिक दिसणार आहे. हीच वेळ आहे काम करण्याची. जे भ्रष्ट आहेत, राज्याला जे लुटतात, ज्यांचे धंदे निवडणुकीवर चालतात, त्यांनी ते आता थांबवावेत. त्यांना आरसा दाखवण्याचे काम आज जनतेने केले आहे.
कोण आहेत मेहराज मलिक?
आम आदमी पक्षाचे नेते मेहराज मलिक आता आमदार झाले आहेत. त्यांनी बराच काळ पक्षाचा झेंडा हातात धरला होता. त्यांना त्यांच्या परिसरात सुरुवातीपासूनच पाठिंबा मिळत होता. त्यांचा जनाधार लक्षात घेऊन पक्षाने त्यांना तिकीट दिले आणि ते पक्षाच्या अपेक्षेप्रमाणे निवडून देखील आले. यापूर्वी त्यांनी जम्मू-काश्मीरच्या जिल्हा विकास परिषदेच्या निवडणुकीत विजय मिळवला होता. त्यावेळी त्यांनी आम आदमी पार्टीच्या बॅनरखाली निवडणूक जिंकली होती. 36 वर्षीय मेहराजने पोस्ट ग्रॅज्युएशन केले आहे.
एका मुलाखतीत त्यांनी सांगितले की, 2008 मध्ये त्यांनी राजकारणात येण्याचा विचार केला होता. आपल्या गावात आणि आजूबाजूच्या परिसरात भ्रष्टाचार पाहिल्यावर तो संपवण्यासाठी राजकीय मार्ग योग्य असल्याचे त्यांना वाटले. यानंतर त्यांनी राजकारणात प्रवेश करण्याचा निर्णय घेतला. हा तो काळ होता, जेव्हा त्यांनी कॉलेजचे शिक्षण पूर्ण केले होते.
आम आदमी पार्टीच का निवडली?
या प्रश्नावर मेहराज म्हणतात की, भ्रष्टाचाराविरोधात आवाज उठवणे हा त्यांचा उद्देश होता आणि त्यासाठी त्यांनी पीडीपी आणि काँग्रेसचे दरवाजेही ठोठावले, पण त्यांचे कोणीही ऐकले नाही. यानंतर त्यांनी दिल्ली मॉडेल म्हणजेच आम आदमी पार्टीबद्दल ऐकले. 2013 हा काळ होता, जेव्हा त्यांना वाटले की, आम आदमी पार्टी देशाच्या बदलाचा एक भाग असू शकते. यानंतर त्याने काश्मीरहून दिल्लीला ट्रेन पकडली आणि आम आदमी पार्टीत दाखल झाले.
डोडा विधानसभा मतदारसंघाचा निकाल
डोडा विधानसभा जागेवर सुमारे 73 हजार लोकांनी मतदान केले होते. या जागेवर बहुकोणीय लढतीमुळे आम आदमी पक्षाला फायदा झाला आणि ही जागा पक्षाच्या खात्यात गेली. या जागेवर आम आदमी पक्षाच्या मेहराज यांना 23 हजारांहून अधिक मते मिळाली. त्याचवेळी गजयसिंह राणा सुमारे 19 हजार मतांसह दुसऱ्या क्रमांकावर राहिले. याशिवाय ओमर अब्दुल्ला यांच्या पक्षाचे उमेदवार खालिद नजीब यांना 13 हजार मते मिळाली आहेत. एवढेच नाही तर डेमोक्रॅटिक प्रोग्रेसिव्ह आझाद पार्टीचे अब्दुल मजीद वाणी यांनाही 10 हजार मते मिळाली.
12 वर्षांपूर्वी ‘आप’ने दिल्लीतून एका चळवळीतून राजकीय पक्ष बनून राजकारणाला सुरुवात केली. त्यांनी निवडणूक लढवली आणि विजयाची नोंद करून पुढे मार्गक्रमण सुरु केले. त्यानंतर पंजाबमध्येही त्यांनी सरकार स्थापन केले. दिल्लीच्या एमसीडीमध्येही भाजपचा पराभव केला. गोवा आणि गुजरातच्या विधानसभा निवडणुकीतही जागा जिंकत आपली उपस्थिती नोंदवली. आता जम्मू-काश्मीरच्या विधानसभा निवडणुकीत खाते उघडून पक्षाला आणखी बळ मिळाले आहे.
