अमेरिका: इराण आणि अमेरिका यांच्यातील वाढता तणाव आता एका अतिशय धोकादायक वळणावर येऊन पोहोचला आहे. आधीच जगावर ‘एल निनो’चे संकट आणि वाढत्या महागाईचे सावट असताना, आता या दोन देशांमधील संघर्षामुळे पुन्हा एकदा तिसऱ्या महायुद्धाची भीती व्यक्त केली जात आहे. इराणने अमेरिकेची २ अपाचे हेलिकॉप्टर्स पाडल्यानंतर, अमेरिकेने बदला घेण्यासाठी थेट इराणवर आक्रमक कारवाई केली आहे.
अमेरिकेचे राष्ट्राध्यक्ष डोनाल्ड ट्रम्प यांच्या आदेशानुसार, अमेरिकन हवाई दल आणि नौदलाच्या लढाऊ विमानांनी इराणमधील २० पेक्षा जास्त महत्त्वाच्या ठिकाणांवर एकाच वेळी बॉम्बफेक केली. अमेरिकेने ही कारवाई ‘स्वसंरक्षणासाठी’ केल्याचे म्हंटले आहे. या भीषण हल्ल्यात इराणची हवाई सुरक्षा यंत्रणा (एअर डिफेन्स सिस्टीम), रडार नेटवर्क आणि ग्राउंड कंट्रोल स्टेशन्स पूर्णपणे नष्ट झाले आहेत.
इराणच्या होर्मोजगान प्रांतातील बंदर अब्बास, केशम द्वीप, सीरिक आणि जास्क या भागांत झालेल्या जोरदार स्फोटांमुळे परिसरात दहशतीचे वातावरण आहे. इतकेच नव्हे, तर सीरिकमधील टेलिकम्युनिकेशन टॉवर आणि पाण्याच्या टाक्याही या हल्ल्यात उद्ध्वस्त झाले आहेत.
इराणनेही या हल्ल्याला चोख प्रत्युत्तर देत बहरीनमध्ये असलेल्या अमेरिकेच्या लष्करी तळावर ड्रोन हल्ले केले आहेत. दोन्ही देशांमधील या लष्करी संघर्षामुळे आंतरराष्ट्रीय स्तरावर खळबळ उडाली आहे.
सर्वात मोठी चिंतेची बाब म्हणजे, ज्या भागांत हे हल्ले होत आहेत, तेथून जगातील २० ते ३० टक्के कच्च्या तेलाचा पुरवठा होतो. यामुळे जागतिक बाजारात मंदी येण्याचे संकेत मिळत असून, हा वाद लवकर न थांबल्यास महागाई आणखी वाढण्याची दाट शक्यता आहे.
