गाझियाबाद: रॉयल चॅलेंजर्स बंगळुरू संघाचा वेगवान गोलंदाज यश दयाल पुन्हा एकदा वादात सापडला आहे. गाझियाबादच्या इंदिरापुरममध्ये राहणाऱ्या एका तरुणीने त्याच्यावर लग्नाचे आमिष दाखवून लैंगिक आणि मानसिक छळ केल्याचा आरोप केला आहे.

पीडितेने उत्तर प्रदेशच्या ‘आयजीआरएस’ ऑनलाइन तक्रार पोर्टलवर २१ जून रोजी तक्रार दाखल केली. यानंतर २५ जून रोजी तिने सोशल मीडियावर यशसोबतचा फोटो पोस्ट करत मुख्यमंत्री योगी आदित्यनाथ यांच्याकडे मदतीची मागणी केली. “गेल्या पाच वर्षांपासून यशसोबत रिलेशनशिपमध्ये होते. त्याने लग्नाचे आमिष दाखवून माझा छळ केला,” असा गंभीर आरोप तिने केला आहे.
आरोप फेटाळले
यश दयालच्या वडिलांनी मात्र हे सर्व आरोप खोटे असल्याचे स्पष्ट करत, “आम्ही या मुलीला ओळखतही नाही,” असे सांगितले आहे.
दरम्यान, पीडितेने यशसोबतचे चॅट्स, व्हिडीओ कॉल्सचे रेकॉर्ड्स आणि स्क्रिनशॉट्स सादर केले आहेत. तिने महिला हेल्पलाइन १८१ वर कॉल केला, परंतु पोलिसांनी कारवाई न केल्याचा आरोपही केला आहे.

पोलीस तपास सुरू
एसीपी अभिषेक श्रीवास्तव यांनी सांगितले की, “एका महिलेने आयजीआरएसकडे तक्रार केली आहे. तक्रार अद्याप लेखी स्वरूपात प्राप्त झाली नाही. मात्र सोशल मीडियावरून माहिती मिळाल्याने प्राथमिक चौकशी सुरू करण्यात आली आहे. दोन्ही पक्षांचे जबाब नोंदवले जातील.”
यश दयालने IPL मध्ये आत्तापर्यंत दोन विजेत्या संघांचे प्रतिनिधित्व केले आहे. त्याने २०२२ मध्ये गुजरात टायटन्सकडून पदार्पण केले. त्याच हंगामात ९ सामन्यांत ११ बळी घेत संघाला चॅम्पियन बनवले. २०२४ मध्ये RCB ने त्याला आपल्या संघात घेतले. त्या मोसमात त्याने १५ विकेट्स घेतल्या. २०२५ मध्येही यशने १५ सामन्यांत १३ विकेट्स घेत RCB ला IPL विजेतेपद मिळवून देण्यात मोठी भूमिका बजावली.
पूर्वीही वादात सापडला होता
यश दयाल पूर्वीही चर्चेत होता. २०२३ मध्ये त्याच्या इन्स्टाग्राम अकाउंटवर मुस्लिमविरोधी पोस्ट केल्याचा आरोप झाला होता. यावर त्याने स्पष्टीकरण देत, “ही पोस्ट मी नाही केली,” असे म्हटले होते. काही दिवसांतच हे प्रकरण शांत झाले.







