पुणे : नोव्हेंबरचा शेवटचा टप्पा सुरू होताच महाराष्ट्रात थंडीचा जोर वाढू लागला आहे. हवामान खात्याच्या अंदाजानुसार, 22 नोव्हेंबर रोजी राज्यात हवामानाचे वेगवेगळे रूप पाहायला मिळणार आहे. बहुतांश भागात हवामान कोरडे राहणार असले, तरी विदर्भात काही ठिकाणी हलक्या सरी पडण्याची शक्यता आहे.

विदर्भाचे हवामान इतर भागांपेक्षा थोडे वेगळे आहे. नागपूर येथील हवामान केंद्राच्या अंदाजानुसार, पूर्व आणि पश्चिम विदर्भातील काही भागांत रविवारी थोडा पाऊस होऊ शकतो. गोंदिया, गडचिरोली, चंद्रपूर आणि यवतमाळ परिसरातील हवामानाकडे लक्ष ठेवणे गरजेचे आहे. मात्र, कोणताही मोठा इशारा किंवा अलर्ट दिलेला नाही; फक्त तुरळक पावसाची शक्यता आहे.
पुण्यात यंदाच्या हंगामातील सर्वांत कमी किमान तापमान नोंदवल्यानंतर सकाळची थंडी वाढली आहे. पुणे, सातारा, सांगली, कोल्हापूर, सोलापूर आणि अहिल्यानगरमध्ये रविवारी हवामान कोरडे राहील. पहाटे आणि रात्री थंडी, तर दुपारी उबदार वाटेल. पुण्यात आकाश स्वच्छ राहील आणि लगेच खूप थंडी वाढण्याची शक्यता नाही.

मराठवाड्यात रविवारी हवामान कोरडे राहील. छत्रपती संभाजीनगर, जालना, बीड, धाराशिव, लातूर, नांदेड, परभणी आणि हिंगोली भागात पहाटे थंडी आणि दुपारी ऊन असे वातावरण असेल. अलीकडेच छत्रपती संभाजीनगर आणि धाराशिवमध्ये रात्रीचा पारा खाली आला आहे. त्यामुळे सकाळी आणि संध्याकाळी गारवा जाणवेल.
कोकणातील मुंबई, ठाणे, पालघर, रायगड, रत्नागिरी आणि सिंधुदुर्ग जिल्ह्यांत हवामान कोरडे राहील. समुद्रकिनारा जवळ असल्याने तिथे अंतर्गत भागाइतकी थंडी नसते. सकाळ-रात्र थोडा गारवा असला, तरी दुपारी ऊन आणि उबदारपणा जाणवेल. मुंबईकरांना थंडीपेक्षा छान सकाळ आणि थोडी उष्ण दुपार अनुभवायला मिळेल.
उत्तर महाराष्ट्रात थंडीचा प्रभाव अधिक वाढला आहे. धुळे, जळगाव, नाशिक आणि नंदुरबार भागात थंडी वाढण्याची शक्यता आहे. सध्या धुळे आणि जळगावात राज्यातील सर्वांत कमी तापमान नोंदवले गेले असून निफाडमध्येही चांगली थंडी पडली आहे. रविवारी पहाटे गारठा राहील. शेतीची कामे, दूध संकलन आणि सकाळी लवकर बाहेर पडणाऱ्यांना याचा जास्त फटका बसू शकतो.






