पुणे : शहरातील नागरिकांच्या आरोग्याशी खेळ करणाऱ्या आस्थापनांविरोधात अन्न व औषध प्रशासनाने कठोर पावले उचलली आहेत. अन्न सुरक्षा व मानके कायदा 2006 अंतर्गत स्वच्छता आणि साठवणुकीच्या नियमांचे उल्लंघन केल्याप्रकरणी शहरातील प्रसिद्ध हॉटेल्ससह दोन मोठ्या ऑनलाइन कंपन्यांचे परवाने तात्काळ निलंबित करण्यात आले आहेत. सहआयुक्त श्रीकांत करकळे यांच्या मार्गदर्शनाखाली सहायक आयुक्त नारायण सरकटे, तसेच सतीश हाके, प्रिया राजगोळकर, दीपाली घोडके, पूजा बागडे आणि सुप्रिया जगताप या अधिकाऱ्यांच्या पथकाने ही मोहीम यशस्वीपणे राबवली.

सिंहगड रस्ता परिसरातील ॲमेझॉन (गजानन इन्व्हेंटरीज) आणि बिग बास्केट (इनोव्हेटिव्ह रिटेल कॉन्सेप्ट) यांच्या गोदामांची तपासणी केली असता अत्यंत धक्कादायक प्रकार समोर आले. या ठिकाणी मुदत संपलेले लाडू, पेढे, केक, पाव, दुधाचे रस्क आणि चटणी असे पदार्थ आढळले. गोदामात सर्वत्र घाण आणि कीटकांचा वावर होता. डब्यांवर धूळ व बुरशी साचली होती, तुपाच्या डब्याचे झाकण तुटलेले होते, तर तेलाची गळती सुरू होती. शीतगृहातही अस्वच्छता आढळली. याशिवाय, खाण्याच्या वस्तू आणि इतर बिगरखाद्य सामान एकत्र ठेवण्यात आले होते. अनेक पाकिटांवर उत्पादनाची आणि वापरण्याची अंतिम तारीख नमूद नसल्याने दोन्ही कंपन्यांचे परवाने रद्दबातल ठरवण्यात आले आहेत.
या मोहिमेअंतर्गत कॅम्प आणि महात्मा गांधी रस्ता परिसरातील एकूण 20 उपाहारगृहांची कसून पाहणी करण्यात आली. यातील 8 हॉटेल्सच्या स्वयंपाकघरात प्रचंड घाण, कीटकांचा वावर, कृत्रिम रंगांचा वापर आणि प्रमाणाबाहेर चव वाढवणारे घटक आढळून आले. त्यामुळे त्यांचे परवाने तातडीने स्थगित करण्यात आले आहेत.

यामध्ये मेट्रो रेस्टॉरंट, सहाना व्हेज रेस्टॉरंट, शिवाय कॉर्नर, ग्रँड दिल्ली दरबार, राजे चायनीज फास्ट फूड अँड ज्यूस बार, द बर्गर बार्न कॅफे, महादेव फूड्स आणि फिरोज केटरर्स या आस्थापनांचा समावेश आहे. या कारवाईमुळे नियमांकडे दुर्लक्ष करणाऱ्या व्यावसायिकांमध्ये मोठी खळबळ उडाली आहे.






