मुंबई: भारतीय नौदलाच्या आयएनएस त्रिकंदने अरबी समुद्रात गंभीर जखमी झालेल्या एका पाकिस्तानी खलाशाचा जीव वाचवला आहे. ही घटना ४ एप्रिल २०२५ रोजी घडली, जेव्हा भारतीय नौदलाची युद्धनौका आयएनएस त्रिकंदला ‘इराणी धोवू अल ओमीदी’ जहाजाकडून आपत्कालीन फोन आला. जहाजाने अहवाल दिला की, त्यांच्या पाकिस्तानी क्रू मेंबरपैकी एक याला इंजिनवर काम करताना गंभीर दुखापत झाली आहे. जहाजाच्या कर्मचाऱ्यांकडून वैद्यकीय मदत घेतल्यानंतरही, क्रू मेंबरची प्रकृती खालावतच आहे. जखमीला ‘अब्दुल रहमान हंझिया’ या इराणकडे जाणाऱ्या दुसऱ्या मच्छीमार बोटीवर हलवण्यात आले होते. दरम्यान, संदेश मिळाल्यानंतर या भागात गस्त घालणाऱ्या आयएनएस त्रिकंदने तातडीने आपला मार्ग बदलला आणि त्या जखमी खलाशाची मदत केली.
युद्धनौकेच्या वैद्यकीय पथकाने जखमीला आपत्कालीन वैद्यकीय सेवा दिली, ज्यामध्ये त्याच्या फ्रॅक्चर झालेल्या बोटांची शस्त्रक्रिया करण्यात आली होती. आयएनएस त्रिकंद’ हे भारतीय नौदलाचे जहाज ओमानच्या किनाऱ्यापासून सुमारे ३५० नॉटिकल मैलांवर गस्त घालत होती. जखमी खलाशाच्या बोटांना फॅक्चर झाले होते आणि रक्तस्राव सुरू होता. आयएनएस त्रिकंदवरील वैद्यकीय अधिकाऱ्यांच्या मदतीने खलाशाला भूल देऊन शस्त्रक्रिया पार पाडण्यात आली, या नौकेवर ११ पाकिस्तानी आणि पाच इराणी खलाशी होते.
भारतीय नौदलाने तातडीने वैद्यकीय मदत पुरवल्यामुळे त्याचा जीव वाचला आणि तो आता बरा होत आहे. ही घटना भारतीय नौदलाची मानवीय मूल्यांचे सर्वोच्च मानके राखण्याची वचनबद्धता आणि संकटात सापडलेल्यांना, त्यांच्या राष्ट्रीयत्वाची पर्वा न करता मदत करण्याची तत्परता दर्शवते. भारतीय नौदलाचा पाकिस्तानी नागरिकांना मानवतावादी मदत आणि आपत्ती निवारण प्रदान करण्याचा दीर्घ इतिहास आहे आणि ही घटना मानवतेच्या त्यांच्या निःस्वार्थ सेवेचे आणखी एक उदाहरण आहे.
