Gujarat Bus Accident News : गुजरामधून एक धक्कादायक घटना घडली आहे. प्रवाशांनी भरलेली भरधाव बस समोरून येणाऱ्या ट्रकला जोरदार धडकली. या भीषण अपघातात तिघांचा जागीच मृत्यू झाला. तर अनेक प्रवासी गंभीर जखमी झाले आहेत. अपघाताची माहिती मिळताच पोलिसांनी घटनास्थळी धाव घेतली आहे. जखमींना उपचारासाठी रुग्णालयात दाखल करण्यात आलं आहे. जखमींपैकी काहीची प्रकृती चिंताजनक असल्याची प्राथमिक माहिती आहे.
मिळालेल्या अधिक माहितीनुसार, अपघातग्रस्त लक्झरी बस गुजरातमधील राजकोट येथून सुमारे ६० प्रवाशांना घेऊन बलरामपूरच्या दिशेने निघाली होती. सोमवारी सकाळी आठ वाजण्याच्या सुमारास कोतवाली देहाट परिसरात आली असता, चालकाचे बसवरील नियंत्रण सुटल्याने समोरून येणाऱ्या ट्रकला जोरदार धडकली. या धडकेत बस आणि ट्रकचा अक्षरश: चक्काचूर झाला आहे. या अपघातात ट्रकचालकासह तिघांचा जागीच मृत्यू झाला. अपघाताची माहिती मिळताच स्थानिकांसह पोलिसांनी बचावकार्य करत जखमींना उपचारासाठी रुग्णालयात दाखल केलं आहे.
