दिल्ली : अठराव्या लोकसभेचे पहिले अधिवेशन सोमवारपासून (24 जून) सुरू होत आहे. लोकसभेचे कामकाज सकाळी 11 वाजता सुरू होणार असून त्यात नवनिर्वाचित सदस्यांचा शपथविधी होणार आहे.
पंतप्रधान मोदींनंतर राजनाथ सिंह, अमित शहा आणि नितीन गडकरी शपथ घेणार आहेत. त्यानंतर मंत्री परिषदेचे इतर सदस्य खासदार म्हणून शपथ घेतील. बुधवारी 26 जून रोजी लोकसभा अध्यक्षपदाची निवडणूक होणार आहे. राष्ट्रपती द्रौपदी मुर्मू 27 जून रोजी दोन्ही सभागृहांच्या संयुक्त अधिवेशनाला संबोधित करणार आहेत.
सोमवारी (दि.24 जून) पंतप्रधान नरेंद्र मोदी आणि त्यांच्या मंत्रिमंडळासह 280 नवनिर्वाचित खासदार शपथ घेतील. तर 264 नवनिर्वाचित खासदार दुसऱ्या दिवशी मंगळवारी (दि.25 जून) शपथ घेतील.
पीएम मोदींच्या मंत्रिमंडळात समाविष्ट करण्यात आलेल्या मंत्र्यांमध्ये 58 लोकसभेचे सदस्य आहेत. केंद्रीय मंत्रिपरिषदेचे 13 सदस्य राज्यसभेचे खासदार आहेत आणि एक मंत्री, रवनीत सिंग बिट्टू हे कोणत्याही सभागृहाचे सदस्य नाहीत. लुधियानामधून त्यांनी भाजपच्या तिकिटावर लोकसभा निवडणूक लढवली, पण त्यांचा पराभव झाला. पीएम मोदी आणि त्यांच्या मंत्र्यांनंतर राज्यनिहाय खासदारांना शपथ दिली जाईल. संसदेच्या या अधिवेशनात शून्य तास आणि प्रश्नोत्तराचा तास असणार नाही.
24 जून रोजी संसदेच्या अधिवेशनाच्या पहिल्या दिवशी 280 नवनिर्वाचित खासदार शपथ घेणार आहेत. दुसऱ्या दिवशी म्हणजे 25 जून रोजी 264 नवनिर्वाचित खासदार शपथ घेतील. त्यानंतर 26 जून रोजी लोकसभा अध्यक्षपदाची निवडणूक होणार आहे. 27 जून रोजी राष्ट्रपती द्रौपदी मुर्मू दोन्ही सभागृहांच्या संयुक्त बैठकीला संबोधित करणार आहेत. 28 जून रोजी, सरकार राष्ट्रपतींच्या अभिभाषणावर चर्चा करेल.
