Darbhanga Train Fire: नवी दिल्ली: नवी दिल्ली हून दरभंगा येथे जाणाऱ्या नवी दिल्ली-दरभंगा क्लोन एक्सप्रेस (ट्रेन क्रमांक ०२५७०) च्या तीन बोगींना आग लागली. इटावा येथील सराय गुप्त रेल्वे स्थानकाजवळ हा अपघात झाला. छठपूजेच्या सणामुळे तिन्ही डबे प्रवाशांनी खचाखच भरले होते. आगीमुळे अडीचशे प्रवाशांचे सर्व सामान जळून खाक झाले. या अपघातात कोणतीही जीवितहानी झाली नाही, सर्व प्रवाशांना सुखरूप बाहेर काढण्यात आले.
वेळीच आग पसरण्यापासून रोखण्यात आली
गाडीच्या तीनही बोगी जळून राख झाल्या. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या. ही आग वेळीच पसरण्यापासून रोखण्यात आली. उत्तर मध्य रेल्वेने सांगितले की, ट्रेन क्रमांक 02570 दरभंगा क्लोन स्पेशल उत्तर प्रदेशातील सराय भोपत रेल्वे स्थानकावरून जात असताना, एस 1 कोचमध्ये धूर दिसल्यानंतर स्टेशन मास्टरने तात्काळ ट्रेन थांबवली. सर्व प्रवाशांना सुखरूप बाहेर काढण्यात आले. यात कोणतीही दुखापत किंवा जीवितहानी झालेली नाही. ट्रेन लवकरच सुटणार आहे.
