चंदीगड: शेतकऱ्यांच्या आंदोलनामुळे हरियाणातील 7 जिल्ह्यांमध्ये पुन्हा एकदा इंटरनेट बंद करण्याची मुदत वाढवण्यात आली आहे. आता 23 फेब्रुवारी रात्री 11:59 पर्यंत इंटरनेट बंद राहणार आहे. हरियाणातील अंबाला, कुरुक्षेत्र, कैथल, जिंद, हिसार, फतेहाबाद आणि सिरसा येथे 23 फेब्रुवारी 11:59 वाजेपर्यंत इंटरनेट सेवा बंद राहतील. म्हणजेच आणखी २ दिवस इंटरनेट सेवा बंद राहणार आहे.
भारतीय किसान युनियन गुरनाम सिंह चदुनी ग्रुपने मोठी घोषणा केली आणि सांगितले की ते पंजाबमधील शेतकऱ्यांच्या समर्थनार्थ गुरुवारी राज्यभरात 12:00 ते 2:00 पर्यंत महामार्ग रोखतील. दुसऱ्या दिवशी शेतकऱ्यांच्या समर्थनार्थ काही मोठा निर्णय घेतला जाणार आहे.
अश्रुधुरामुळे शेतकऱ्याचा मृत्यू
हरियाणा पोलिसांनी शंभू आणि खनौरी सीमेवर बॅरिकेड तोडण्याचा शेतकऱ्यांचा प्रयत्न हाणून पाडण्यासाठी अश्रुधुराच्या नळकांड्या फोडल्या, परिणामी एका शेतकऱ्याचा मृत्यू झाला आणि काही जण जखमी झाले. शेतकऱ्यांनी पुन्हा ‘दिल्ली चलो’ आंदोलन सुरू केले आहे. दोन्ही बाजूंच्या चर्चेच्या चौथ्या फेरीत सरकारने दिलेला प्रस्ताव शेतकरी नेत्यांनी धुडकावून लावला होता. या दोन सीमा बिंदूंवर तळ ठोकून पंजाबमधील हजारो शेतकरी बुधवारी सकाळी पुन्हा आंदोलन सुरू करणार असल्याची घोषणा केली होती.
एक शेतकरी गंभीर जखमी, रोहतक पीजीआयमध्ये उपचार सुरू
पंजाबमधील खनौरी सीमेवर पोलिस आणि आंदोलक शेतकऱ्यांमध्ये झालेल्या चकमकीत प्रीतपाल नावाचा शेतकरी गंभीर जखमी झाला, त्याला हरियाणा पोलिसांच्या कर्मचाऱ्यांनी रोहतक पीजीआयमध्ये आणले, जिथे त्याच्यावर उपचार सुरू आहेत. प्रीतपालच्या चेहऱ्यावर आणि पायाला जखमा झाल्या असून सध्या त्यांची प्रकृती धोक्याबाहेर असल्याचे सांगण्यात येत आहे. प्रीतपाल जखमी झाल्यानंतर सोशल मीडियावर अनेक अफवा पसरल्या आणि पोलिसांशी झालेल्या चकमकीत प्रीतपालचा मृत्यू झाल्याचे सांगण्यात आले. याबाबत सायंकाळी उशिरा हरियाणा पोलिसांनी सोशल प्लॅटफॉर्मवर एक ट्विटही केले.
