पुणे: उत्तर प्रदेशातील (Crime News) लखनऊ (Lucknow) शहरातून एक अत्यंत धक्कादायक घटना समोर आली आहे. एका 7 वीत शिकणाऱ्या 15 वर्षीय अल्पवयीन मुलीला इंस्टाग्रामवर अनोळखी तरुणासोबत मैत्री करणे चांगलेच महागात पडले आहे. तरुणी युवकाला भेटायला गेल्यानंतर 3 जणांनी मिळून 15 वर्षीय तरुणीवर बलात्कार केला आहे. या प्रकरणी पोलिसांनी आरोपींविरुद्ध गुन्हा दाखल करून तपास सुरू केला आहे.
मिळालेल्या माहितीनुसार, दीड महिन्यापूर्वी तरुणीने विमल यादव नावाच्या तरुणाशी इन्स्टाग्रामवर मैत्री केली होती. तरुणाने विश्वास संपादन करून मुलीला भेटायला बोलावले. त्यानंतर तो तिला मडियांव पोलिस स्टेशन परिसरातील आयआयएम रोडवरील एका हॉटेलमध्ये घेऊन गेला. या हॉटेलमध्ये विमलचे मित्र पियुष मिश्रा आणि शुभम शुक्ला हे देखील आधीच हजर होते.
हॉटेलच्या रूमवर घेऊन गेल्यानंतर विमल आणि त्याच्या मित्रांनी मुलीवर जबरदस्ती करायला सुरुवात केली. मुलीने विरोध केला, पण नराधमांनी तिला ओलीस ठेवले. त्यानंतर आळीपाळीने त्यांनी मुलीवर दोन दिवस बलात्कार केला. एवढेच नाही, तर त्यांनी या अत्याचाराचा व्हिडिओ देखील काढला आणि तो व्हायरल करण्याची धमकी देऊन तिला गप्प राहण्यास भाग पाडले.
2 नोव्हेंबर रोजी पीडितेने कसाबसा या आरोपींच्या तावडीतून स्वतःची सुटका करून घेतली. घरी गेल्यावर तिने घडलेला संपूर्ण प्रकार कुटुंबियांना सांगितला. कुटुंबियांनी तत्काळ पोलिस ठाणे गाठून आरोपींविरुद्ध तक्रार दाखल केली. सध्या पोलिस या प्रकरणाचा संपूर्ण तपास करत आहेत.
