Crime News: भोपाळ : मध्य प्रदेशातील भोपाळ (Bhopal) शहरात दोन बहिणींच्या नेतृत्वाखाली सुरू असलेल्या कथित देहव्यापार (Prostitution) आणि जबरदस्ती धर्मांतर प्रकरणाचा पोलिसांनी भांडाफोड केला आहे. दोन महिलांनी वेगवेगळ्या वेळी दिलेल्या तक्रारीनंतर हा प्रकार उघडकीस आला. छत्तीसगडमधील 21 वर्षांची ब्युटीशियन आणि भोपाळमधील 30 वर्षांच्या महिलेने पोलिसांकडे धाव घेतली होती. त्यानंतर तपास सुरू करण्यात आला.
पोलिसांनी दिलेल्या माहितीनुसार, आर्थिकदृष्ट्या कमकुवत आणि नोकरीच्या शोधात असलेल्या तरुणींना लक्ष्य केले जात होते. त्यांना चांगल्या नोकरीचे आमिष दाखवून विश्वासात घेतले जात होते. त्यानंतर त्यांच्यावर अत्याचार करून त्यांना चुकीच्या मार्गाला लावल्याचा आरोप आहे. या प्रकरणात आफरीन आणि अमरीन या दोन बहिणींना अटक करण्यात आली आहे. इतर तीन आरोपी सध्या फरार असून त्यांचा शोध सुरू आहे.
21 वर्षांच्या तरुणीने तक्रारीत म्हटले आहे की, नोव्हेंबर 2025 मध्ये तिला ओळखीच्या निमित्ताने एका ठिकाणी नेण्यात आले. तेथे तिला पेयामध्ये काहीतरी मिसळून दिले गेले. ती बेशुद्ध झाल्यानंतर तिच्यावर अत्याचार झाल्याचा आरोप आहे. पुढील काही महिन्यांत तिला वेगवेगळ्या ठिकाणी नेऊन दबाव टाकण्यात आला. तिचे फोटो काढून तिला धमकावण्यात आले, असेही तिने सांगितले.
दुसऱ्या महिलेनेही अशाच प्रकारची तक्रार दिली आहे. काही जणांनी एकत्र येऊन तिला औषध देत अत्याचार केल्याचा आरोप तिने केला आहे. तसेच जबरदस्तीने धर्मांतरासाठी दबाव आणण्यात आल्याचेही नमूद केले आहे.
या सर्व तक्रारींच्या आधारे पोलिसांनी बलात्कार, कट रचणे आणि जबरदस्ती धर्मांतरासंबंधी विविध कलमांखाली गुन्हे नोंदवले आहेत. प्रकरणाचा पुढील तपास सुरू आहे.
