पणजी: निसर्गरम्य (Crime News) गोवा सध्या एका रशियन पर्यटकाच्या क्रूर कृत्यांमुळे हादरून गेला आहे. उत्तर गोव्यातील अरंबोल आणि मोरजी परिसरात झालेल्या दोन रशियन महिलांच्या हत्येचा तपास करताना पोलिसांनी ३७ वर्षीय रशियन नागरिक अलेक्सी लियोनोव याला बेड्या ठोकल्या. मात्र, अटकेनंतर अलेक्सीने जो खुलासा केला आहे, त्याने केवळ गोवा पोलीसच नाही तर संपूर्ण देश सुन्न झाला आहे. आपण आतापर्यंत तब्बल १५ महिलांना ‘मोक्ष’ मिळवून दिला आहे, असा खळबळजनक दावा या नराधमाने केला आहे.
काही दिवसांपूर्वी अरंबोलमध्ये ३५ वर्षीय एलेना कस्थानोवा मृतदेह सापडला. अलेक्सी हा तिचा लिव्ह-इन पार्टनर होता. तपासादरम्यान पोलिसांना नग्नावस्थेत ३७ वर्षीय एलेना वानेएवा हिचा मृतदेह सापडला. या दोन्ही महिला रशियन नागरिक होत्या. पोलिसी खाक्या दाखवताच अलेक्सीने या दोन्ही हत्यांची कबुली देत मोठा खुलासा केला.
अलेक्सी रशियन महिलांना प्रेमाच्या जाळ्यात ओढायचा आणि नंतर त्यांच्याकडून पैसे उकळायचा. जर एखादी महिला त्याच्या तावडीतून सुटण्याचा किंवा कोणाशी संपर्क साधण्याचा प्रयत्न केला, तर तो तिचा गळा चिरून काटा काढत होता. अलेक्सीच्या दाव्यानुसार, त्याने केवळ गोव्यातच नव्हे तर हिमाचल प्रदेशातही अनेक महिलांची अशाच प्रकारे हत्या केली होती. सिरीयल किलर अलेक्सीने १५ जणांची हत्या कशी केली याची माहिती दिली, दरम्यान, पोलिस या प्रकरणी अधिक तपास करत आहेत.
