मुंबई : उपमुख्यमंत्री एकनाथ शिंदे यांना ब्रिटनच्या संसदेतील वरिष्ठ सभागृह हाऊस ऑफ लॉर्ड्समध्ये ‘कॉमनवेल्थ पब्लिक लीडरशिप रिकग्निशन’ या प्रतिष्ठेच्या पुरस्काराने सन्मानित करण्यात आले. या सोहळ्यात जगभरातील मान्यवरांच्या उपस्थितीत ‘जय महाराष्ट्र’चा निनाद घुमला. विशेष म्हणजे एकनाथ शिंदे यांनी आपल्या भाषणाची सुरुवात ‘नमस्कार-जय महाराष्ट्र’ अशा मराठी शब्दांनी केली आणि महाराष्ट्राच्या विकासाची वाटचाल उपस्थितांसमोर मांडली.
मुख्यमंत्री आणि त्यानंतर उपमुख्यमंत्री म्हणून राबवलेल्या नागरिककेंद्री, पारदर्शक आणि नाविन्यपूर्ण प्रशासनासाठी शिंदे यांना हा पुरस्कार देण्यात आला. महिलांच्या आर्थिक स्वावलंबनासाठी राबवण्यात आलेली ‘मुख्यमंत्री माझी लाडकी बहीण योजना’ आणि नागरिकांना शासकीय सेवा थेट उपलब्ध करून देण्यासाठी सुरू केलेला ‘शासन आपल्या दारी’ उपक्रम यांचा विशेष उल्लेख पुरस्काराच्या मानपत्रात करण्यात आला आहे.
आपल्या भाषणात शिंदे यांनी आपल्या जडणघडणीमध्ये आई आणि पत्नीच्या कष्टांचा मोठा वाटा असल्याचे सांगितले. सर्वसामान्य नागरिकांसाठी काम करण्याची प्रेरणा त्यातून मिळाल्याचे त्यांनी नमूद केले. त्यांच्या या वक्तव्याला सभागृहातून जोरदार टाळ्यांचा प्रतिसाद मिळाला.
महाराष्ट्राच्या विकासाची दिशा छत्रपती शिवाजी महाराजांची स्वराज्याची संकल्पना, डॉ. बाबासाहेब आंबेडकरांचा सामाजिक न्यायाचा विचार आणि सामान्य माणसाला केंद्रस्थानी ठेवणारे प्रशासन या तीन मूल्यांवर आधारित असल्याचे शिंदे यांनी सांगितले. हा पुरस्कार केवळ आपला वैयक्तिक सन्मान नसून महाराष्ट्रातील जनतेच्या कष्टांचा, त्यांच्या आकांक्षांचा आणि राज्याच्या विकासाच्या वाटचालीचा गौरव असल्याचे त्यांनी स्पष्ट केले.
यूके एशियन बिझनेस कौन्सिल आणि ‘कॅनव्हास फॉर केअर क्रिएटिव्ह आर्ट कॅम्पस’ यांच्या संयुक्त विद्यमाने हाऊस ऑफ लॉर्ड्समध्ये हा सोहळा आयोजित करण्यात आला होता. उत्तर आयर्लंडच्या माजी फर्स्ट मिनिस्टर ऑनरेबल बॅरोनेस आर्लेन फॉस्टर, यूके एशियन बिझनेस कौन्सिलचे चेअरमन अँड्र्यू ग्रोकॉक, कौन्सिलचे उपाध्यक्ष सुदीप सकाळे यांच्यासह ब्रिटनचे वरिष्ठ मंत्री, संसद सदस्य, महापौर, विविध देशांचे राजदूत, जागतिक उद्योजक आणि कॉमनवेल्थ देशांतील मान्यवर उपस्थित होते.
