पाटणा (बिहार) : बिहारमधील सत्ताधारी पक्ष जनता दल युनायटेडमध्ये उलथापालथ होत असल्याची चर्चा आहे. मुख्यमंत्री नितीश कुमार मंत्रिमंडळ बरखास्त करण्याची शक्यता आहे. त्याशिवाय, राष्ट्रपती राजवट लावण्याची मागणी करू शकतात अशी शक्यता निर्माण झाली आहे. दिल्लीमध्ये जेडीयूची महत्त्वाची बैठक होणार आहे. त्याचवेळी जेडीयूचे अध्यक्ष ललन सिंह यांच्याबाबतही वेगवेगळ्या चर्चा सुरू आहेत.
जेडीयूचे राष्ट्रीय अध्यक्ष ललन सिंह हे आपल्या पदाचा राजीनामा देऊ शकतात. दुसरीकडे दरवर्षी पक्षाची बैठक होते. ही नियमित बैठक आहे, असे नितीश किमार यांनी दिल्लीला रवाना होण्यापूर्वी सांगितले. एनडीएमध्ये सहभागी होण्याबाबत आणि जेडीयूच्या राष्ट्रीय अध्यक्षांना बदलण्याच्या प्रश्न वितारला असता त्यावरही त्यांनी मौन पाळले.
उपमुख्यमंत्री तेजस्वी यादव यांनी सांगितले की, ललन सिंह यांच्या राजीनाम्याच्या चर्चा ह्या अफवा आहेत. प्रत्येक पक्ष राष्ट्रीय कार्यकारिणीची बैठक आयोजित करत असतो. बिहार सरकारमधील मंत्री अशोक चौधरी, मंत्री सुनील कुमार आणि मंत्री विजेंद्र यादव पाटणा विमानतळावरून रवाना झाले आहेत.जेडीयूमध्ये राष्ट्रीय अध्यक्ष ललन सिंह यांच्यावरून सध्या मोठा वाद सुरू आहे. लालूप्रसाद यादव यांच्या आरजेडीसोबत ललन सिंह यांची जवळीक वाढल्याने त्यांना अध्यक्षपदावरून हटवले जाण्याची शक्यता आहे, अशी राजकीय वर्तुळात चर्चा आहे.
बिहारमध्ये २०२४ च्या लोकसभा निवडणुकीसाठी महाआघाडीमध्ये जागावाटपाबाबतच्या घडामोडींनाही वेग आला आहे. सूत्रांनी दिलेल्या माहितीनुसार महाआघाडीमधील जागावाटप निश्चित झालं आहे. त्यानुसार आरजेडी आणि जेडीयू प्रत्येकी १७ जागांवर निवडणूक लढवतील. तर काँग्रेसला ५ ते ६ जागा दिल्या जातील. मात्र या फॉर्म्युल्यामध्ये डाव्या पक्षांचं नाव नाही आहे. डाव्या पक्षांनी महाआघाडीसोबत मिळून बिहार विधानसभेची निवडणूक लढवली होती.
