नवी दिल्ली : राज्यात सर्व पक्षांना विधानसभा निवडणुकांचे वेध लागले आहेत. त्या पार्श्वभूमीवर सर्वच पक्ष तयारीला लागलेले दिसून येत आहे. अशातच आता महाराष्ट्रातील विधानसभा निवडणुकांबाबत मोठी माहिती समोर आली आहे. आता निवडणूक आयोगाने तयारी सुरू केली असून आयोगाची एक टीम महाराष्ट्रात येणारआहे आणि निवडणुका वेळेवरच होणार अशी शक्यता आता दिसू लागली आहे.
याबाबत अधिक माहिती अशी की, महाराष्ट्र विधानसभा निवडणूक होण्यासाठी तयारी सुरू असून ठरलेल्या कार्यक्रमाप्रमाणेचे केंद्रीय निवडणूक आयोगाकडून निश्चित कार्यक्रम तयार केला जाणार आहे, अशी माहिती सूत्रांनी दिली आहे. केंद्रीय निवडणूक आयोगाच्या टीमचा महाराष्ट्र दौरा निश्चित झाला असल्याची माहिती मिळत आहे. सप्टेंबर महिन्याच्या शेवटच्या आठवड्यात ही टीम महाराष्ट्रात येणार आहे. या टीममध्ये, 10 ते 12 केंद्रीय निवडणूक आयोग प्रतिनिधींचा सहभाग असणार आहे.
विशेष म्हणजे, देशाचे मुख्य निवडणूक आयुक्त आणि दोन्ही सहआयुक्त या टीमचं नेतृत्व करणार आहेत. आगामी महाराष्ट्र निवडणूक कार्यक्रमावर ही टीम शिक्कामोर्तब करणार अशी शक्यता वर्तवण्यात येत आहे. विधानसभा निवडणूक घोषित करण्यातील हा महत्त्वाचा दौरा असणार आहे. केंद्रीय निवडणूक आयोगाची टीम राज्यातील प्रशासकीय यंत्रणासोबत आढावा बैठक घेणार आहे.
निवडणूक आयोगाच्या आयुक्तांचं नेमकं प्लॅनिंग काय?
काही दिवसापूर्वीच जम्मू-काश्मीर आणि हरियाणाच्या निवडणुकीच्या तारखांची घोषणा करण्यात आली होती. केंद्रीय निवडणूक आयुक्त राजीव कुमार यांनी महाराष्ट्रात होणाऱ्या विधानसभा निवडणुकीबाबतही मोठी घोषणा केली आहे. ‘2019 साली महाराष्ट्र आणि हरियाणामध्ये एकत्र निवडणुका झाल्या होत्या. महाराष्ट्राच्या विधानसभेचा कार्यकाळ 26 नोव्हेंबर रोजी संपतोय, तर हरियाणाचा 3 नोव्हेंबरला, त्यावेळी जम्मू काश्मीरचा विषय नव्हता.
यावेळी 4 निवडणुका एका वर्षात घ्यायच्या आहेत’, असं केंद्रीय निवडणूक आयुक्तांनी आधीच स्पष्ट केलं आहे. तसेच महाराष्ट्रात विधानसभा कार्यकाळ संपण्याआधीच निवडणुका होणार आहेत, असं केंद्रीय निवडणूक आयुक्तांनी स्पष्ट केलं होतं. त्यामुळे आता 26 नोव्हेंबरआधी महाराष्ट्रात नवीन सरकार अस्तित्वात येईल. म्हणजेच दिवाळीनंतर नोव्हेंबर महिन्यामध्ये महाराष्ट्रात निवडणुका होतील हे आता जवळपास निश्चित झालं आहे.
