नवी दिल्ली : दिल्ली दारू घोटाळा प्रकरणी तिहार तुरुंगात बंद असलेले अरविंद केजरीवाल यांना आणखी एक मोठा धक्का बसला आहे. दिल्लीचे मुख्यमंत्री अरविंद केजरीवाल यांचे स्वीय सचिव बिभव कुमार यांच्यावर दक्षता विभागाने मोठी कारवाई करत त्यांना पदावरून हटवले आहे. मंगळवारी बिभव कुमार यांनी तिहार तुरुंगात जात आम आदमी पक्षाच्या नेत्याची भेट घेतली होती.
दक्षता विभागाने अरविंद केजरीवाल यांचे पीए म्हणजेच खाजगी सचिव बिभव कुमार यांची नियुक्ती योग्य मानली नाही. दक्षता विभागाचे विशेष सचिव वायव्हीव्हीजे राजशेखर यांनी जारी केलेल्या आदेशात म्हटले आहे की, बिभव कुमारच्या नियुक्तीसाठी निर्धारित प्रक्रिया आणि नियमांचे प्रामाणिकपणे पालन केले गेले नाही. त्यामुळे अशी नियुक्ती बेकायदेशीर व अवैध आहे.
दक्षता संचालनालयाने 10 एप्रिलपासून दिल्लीच्या मुख्यमंत्र्यांचे खाजगी सचिव बिभव कुमार यांची सेवा समाप्त केली आहे. सरकारी कर्मचाऱ्यावर प्राणघातक हल्ला आणि कामात अडथळा आणल्याबद्दल बिभव कुमार विरुद्ध 2007 मध्ये प्रलंबित असलेल्या कायदेशीर खटल्याचाही या आदेशात उल्लेख आहे.
अरविंद केजरीवाल यांचे स्वीय सचिव बिभव कुमार यांच्यावर दक्षता विभागाने कारवाई केली आहे, जेव्हा ईडीने काही दिवसांपूर्वी त्यांची चौकशी केली होती. दिल्ली दारू घोटाळा प्रकरणी अंमलबजावणी संचालनालयाने 8 एप्रिल रोजी बिभव कुमारची चौकशी केली होती. अरविंद केजरीवाल हेही अबकारी धोरण घोटाळ्याप्रकरणी तिहार तुरुंगात आहेत.
दिल्ली दारू घोटाळ्याशी संबंधित मनी लाँड्रिंग प्रकरणात केजरीवाल यांना 21 मार्च रोजी अंमलबजावणी संचालनालयाने (ईडी) अटक केली होती. याप्रकरणी मनीष सिसोदिया आणि संजय सिंह यांनाही अटक करण्यात आली आहे.
